La fin nunspetgada dal campiunadi da ballape, il lockdown durant la crisa da corona e lura anc la tschertga dad in nov trenader. Quai eran ils problems dal CB Scuol durant las ultimas emnas. Perquai ch'il trenader actual Christian Happich mida la plazza da lavur era l’equipa da l’Engiadina Bassa sfurzada dad ir a la tschertga d'in nov trenader. Cun Pavel Leden da la Tschechia ha l’equipa uss chattà in nov trenader. Leden surpiglia la squadra dalunga e prepara quella sin la nova stagiun che cumenza la fin d'avust.
Sez profi e trenader da juniors
Pavel Leden è oriundamain da Teplice. En il nord da la Tschechia ha el cumenzà cun il ballape. Divers onns è el stà profi en la meglra liga da ballape en Tschechia. Leden ha dentant era dà en la segunda Bundesliga tar Chemnitz, in lieu mo 100 kilometers davent da sia patria. Uss lavura Pavel Leden en la regiun da l’Engiadina Bassa. Uschia èsi vegnì al contact cun il CB Scuol, l’equipa che dat il campiunadi en la tschintgavla liga.
Finamira da dar ina buna stagiun
Avant dus onns è il CB Scuol vegni relegà en tschintgavla liga. Quai suenter che l’equipa aveva dà divers onns en quarta liga. L’emprima stagiun ina liga pli bass aveva il CB Scuol terminà sin plazza quatter, ed era la davosa stagiun era il CB Scuol fin tar la fin sfurzada pervia dal coronavirus sin plazza quatter.
