In tal success n’han ils juniors B da la Surselva, per gronda part juniors da l’US Schluein Glion, ma er dals auters clubs sursilvans sco il CB Trun/Rabius, l’US Danis-Tavanasa u il CB Lumnezia, anc mai pudì festivar.
El saja fitg losch da quai che ses bun 20 juniors hajan prestà ils davos mais, manegia il trenader Claudio Bundi. Propi n’hajan els anc betg realisà quest success. Per el sez saja propi in’onur da dastgar esser trenader dad ina tala equipa, di Bundi. Quests juniors na stoppian ins betg clamar al trenament, els vegnian dad els anora e veglian propi dar in bun ballape.
Ed er sch’ina part da quels juniors da 16 e 17 onns stoppian ussa, pervia da la vegliadetgna, bandunar la squadra è Claudio Bundi persvadì che sia equipa fetschia era ina buna figura en la pli auta liga da juniors en la Svizra Orientala, ina liga cun blers clubs ord la Val dal Rain ed ord la regiun dal Lai da Constanza.
RR actualitad 07:00