A lunga vista na vegn l’US Danis-Tavanasa betg da tegnair duas equipas. Surtut il cader da giugaders en la quarta liga è magher. En il davos gieu da la runda d’atun han ins schizunt stuì dar forfait pervi da la mancanza da giugaders. Il giavisch e la finamira fiss uss da collavurar cun il CB Trun/Rabius. Ils dus clubs na discurran dentant betg d’ina collavuraziun u schizunt ina fusiun, mabain d’ina gruppaziun.
Il davos temp èn il discurs vegnids pli intensivs ed il project pli concrets. Ord vista dal CB Trun/Rabius na datti nagins obstachels pli, sco quai ch’il president Otto Beer ed er il trenader da l’emprima equipa dal CB Trun/Rabius, Donat Albin, dian. Albin è persvadì ch’omadus clubs profitassan d’ina tala gruppaziun. I na saja oz betg pli quella rivalitad sco pli baud ed i saja ussa da patratgar regiunal e betg pli local, uschia Donat Albin.
Miseria da chattar in trenader
La gruppaziun tranter il CB Trun/Rabius e l’US Danis-Tavanasa è sin buna via, i dat dentant anc intgins obstachels. Per l'ina èn ils da Tavanasa a la tschertga d’in nov trenader suenter che Sandro Cathomas ha abditgà ord motivs privats. Senza trenader – nagina gruppaziun, uschia il president da l’US Danis-Tavanasa, Daniel Carigiet ch’ha dentant betg vulì prender posiziun en chaussa. Il frust è il mument grond tar el e tar l’US Danis-Tavanasa.
Il project da gruppaziun pudess uschia tuttina anc vegnir franà curt avant l’arrivada. Enfin mez zercladur ston ils dus clubs ina gia annunziar las equipas per la proxima stagiun 2020/2021 e fin la fin dal mais sto er vegnì decis definitiv davart ina collavuraziun tranter ils dus clubs sursilvans. Ils pertutgads, en emprima lingia ils dus presidents Otto Beer e Daniel Carigiet èn uschia sut squitsch.
