Siglir tar il cuntegn

Header

audio
Il CB Trun/Rabius e l'US Danis-Tavanasa collavureschan en l'avegnir.
Or da Actualitad dals 12.06.2020.
laschar ir. Durada: 04:04 minutas.
cuntegn

Trun/Rabius e Danis-Tavanasa Ils dus rivals lavuran ensemen

CB Trun/Rabius encunter US Danis-Tavanasa, in classicher, in derbi sursilvan ch’ha procurà durant decennis per gronda euforia, emoziuns e spectacul. La rivalitad da pli baud è oz dentant quasi svanida. Ils dus clubs na cumbattan betg pli in encunter l’auter, mabain in per l’auter.

A partir da la proxima stagiun 2020/2021 datti tranter Trun/Rabius e Danis-Tavanasa ina collavuraziun. Ils responsabels èn persvadì ch’omadus clubs profiteschian da quai.

La dumonda da collavurar è vegnida avant in mez onn da l’US Danis-Tavanasa che patescha adina pli fitg da la mancanza da giugaders, gist tar l’emprima equipa che dat en quarta liga. Gia durant l’atun passà ha els perquai uschia trenà ensemen cun il CB Lumnezia ch’è en ina sumeglianta situaziun. Uss na datti dentant betg ina collavuraziun u ina gruppaziun cun ils Lumnezians, mabain cun il vischin Trun/Rabius.

La finamira è da barattar giugaders per uschia rinforzar l’equipa dal CB Trun/Rabius che dat en terza liga sco era l’equipa da l’US Danis-Tavanasa che dat en quarta liga. Anc betg pertutgà fitg da quest project èn il mument las duas equipas che dattan en la 5avla liga.

In emprim pass è gia fatgs. Cun Renzo Albin da Trun ha l’emprima equipa da l’US Danis-Tavanasa engaschà in nov trenader suenter esser stà ditg a la tschertga d’in trenader. Sandro Cathomas ch’ha trenà ils da Danis-Tavanasa ils davos onns aveva demissiunà ord motivs privats. Renzo Albin è stà la stagiun passada cau da juniors tar Trun/Rabius. Quest post surpiglia da nov Fabian Collenberg. L’emprima equipa da Trun/Rabius vegn vinavant trenada da Donat Albin ensemen cun Philippe Vincenz.

Ord l'archiv:

Il redactur da sport Gian Carlo Candinas ha avant pli che 4 onns dà in sguard sin la rivalitad tranter l'CB Trun/Rabius e la US Danis-Tavanasa:

Sportissimo 17:00

Artitgels legids il pli savens

Scrollar a sanestra Scrollar a dretga