L'emprim gol dal gieu è crudà en la 32avla minuta entras Alessandro Giacomelli, il trenader e giugader da Schluein Glion. Anc avant pausa ha l'equipa da chasa pudì augmentar al 2:0. La decisiun è lura crudada tranter la 70avla e la 79avla minuta, cura che Schluein Glion ha sajettà trais gols en seria al resultat final da 6:0. L'um dal gieu è stà Lars Caduff ch'ha tutgà gist trais giadas.
La revantscha n‘è uschia betg gartegiada al CB Lumnezia. En la davosa runda d‘atun avevan ils Lumnezians pers a Vella l‘emprim derbi cun 1:3.
USSI resta sin ils chaltgogns dal leader
Grazia a questa victoria resta Schluein Glion vinavant sin ils chaltgogns al capo-gruppa Bogn Ragaz che maina la tabella cun 4 puncts avantatg, dentant era cun in gieu dapli. Il CB Lumnezia percunter resta a la cua da la tabella. Per ils Lumnezians èsi gia la 9avla terrada en il 13avel gieu da campiunadi en questa 3. liga. Il dischavantatg sin il stritg munta a 3 puncts.
Minuta da silenzi
Avant il gieu è vegnì commemorà a Stephan Berni, il defensur da l'US Schluein Glion ch'è mort nunspetgadamain avant in'emna. Berni ha gì be 33 onns ed è stà durant blers onns ina da las pitgas da l'uniun sportiva Durant il gieu han tut ils giugaders purtà ina fascha naira.
Bun 10 dis pausa
Ils proxims gieus da campiunadi dattan las duas equipas sursilvanas la fin d‘emna dals 27 e 28 d‘avrigl. L‘US Schluein Glion frunta ordaifer sin il Club da ballape da Domat ed il CB Lumnezia dat ordaifer encunter il FC Netstal.
RR novitads 06:00
