Siglir tar il cuntegn

Header

USSI - CB Lumnezia
Legenda: Dapi la crisa da Corona na datti nagins cumbats sin las plazzas da ballape en Surselva. RTR
cuntegn

USSI / CB Lumnezia Il ballape manca propi fitg

Uss fiss en sasez il pli bel temp per ils fans dal ballape. Avant intginas emnas avess giu da cumenzar la runda da primavaira. Pervia dal coronavirus na va il mument dentant nagut. Ils giugaders n’han gnanc pudì trenar durant quest temp da crisa.

Il campiunadi e vegnì franà ed actualmain nagin che sa co vinavant. L'Associaziun svizra da ballape sto perquai decider tant pli spert tge che capita cun la stagiun da ballape 2019/2020, quai davent da la pli auta liga en Svizra, la Super League, enfin las ligas bassas, las ligas regiunalas.

I dat pliras variantas; annullar la stagiun, cumenzar il proxim temp e prolungar la stagiun enfin viaden en la stad, giugar senza aspectaturs – dumondas che la Federaziun sto sclerir ils proxims dis.

Tenor mai na fa quai betg pli senn da cumenzar cun la runda da primavaira, i manca simplamain il temp.
Autur: Corsin Cavegntrenader US Schluein Glion

Squitsch da temp

Tar l’US Schluein Glion – che dat en la segunda liga regiunala – dessi en mintga cas tscherts problems da termins, avess la stagiun dad ir liber il proxim temp. Quai di il trenader Corsin Cavegn. Schluein Glion stuess anc giugar 11 rundas da campiunadi en questa stagiun. Vegniss la stagiun annullada, mitschass l’USSI er da la relegaziun e na stuess betg pli tremblar da stuair far il pass enavos en la terza liga regiunala. Il mument, suenter la runda d’atun, sa chattan ils da Schluein Glion be sin il 11avel plaz da la tabella ed uschia sut il stritg.

Tut nagin problem

Ina situaziun extraordinaria èsi er per il CB Lumnezia che sa chatta il mument a la testa da la quarta liga regiunala. Vegniss la stagiun annullada, stuessan ils Lumnezians er sutterrar il siemi da far il pass en la terza liga. Quai na fiss dentant nagin problem, dil il trenader Giacun Vinzens. L’impurtant na saja betg en tge liga ch’ins dettia ballape, mabain ch’ins fetschia quai sport cun plaschair.

Dad in maun èsi forsa era bun ch’i dat ina giada ina pausa pli lunga, uschia survegnan ils giugaders forsa puspè dapli plaschair cura ch’i va liber.
Autur: Giacun Vinzenstrenader CB Lumnezia

Nagins pensums als giugaders

Tant a l’US Schluein Glion sco er al CB Lumnezia mancassan ils trenaments, avess la stagiun dad ir liber d’in di sin l’auter. Ma er qua en las duas equipas sursilvanas en la medema situaziun sco tut ils auters. I fiss simplamain da far il meglier ordlonder, din ils trenaders Corsin Cavegn e Giacun Vinzens. Pensums n’hajan els dà nagins als giugaders durant quest temp da corona. I vegn simplamain sperà ch’ils giugaders hajan fatg insatge sport las davosas emnas per restar fit.

RTR Sportissimo 17:00