A moda dramatica ha l'equipa da la Foppa fatg il zercladur il pass en la 2. liga regiunala. En ils ultims gieus è Schluein Glion anc vegnì da surpassar l'equipa da Bogn Ragaz a la testa da la tabella.
Liga pli auta cun pli paucs giugaders
Durant la stagiun 2018/2019 èn 3. liga ha la USSI gì radund 25 giugaders en il cader. Suenter l'ultima stagiun han dentant plirs giugaders bandunà il club ed auters han midà en la segunda equipa. Betg tuts sajan pronts d'investir anc dapli temp en il ballape. En 2. liga vegn trenà pli bler, pli intensiv ed er ils viadis als gieus èn pli lungs.
Tenor il trenader Alessandro Giacomelli, fissi grev da tegnair pitg en la 2. liga regiunala cun mo 16 giugaders. La finamira saja d'avair bun 20 giugaders en il cader sin che la stagiun 2019/2020 cumenza.
En l'entir chantun a la tschertga da giugaders
Las ultimas emnas han Alessandro Giacomelli ed il schef da sport dal club, David Caduff contactà numerus giugaders en la regiun. Dentant quai, per il solit senza success. Er divers clubs en Surselva èn vegnids contactads:
Giugaders dal CB Lumnezia u dal CB Trun/Rabius na vulan betg exnum vegnir tar nus. Ins senta la rivalitad tranter ils clubs.
Er a Cuira u a Domat èn ils responsabels da Schluein Glion stads a la tschertga da giugaders - dentant era là senza success.
Agid da la 2. equipa
Per dar en 2. liga è il cader actualmain fitg pitschens. Tuttina è Alessandro Giacomelli optimistics che la situaziun vegn a sa meglierar enfin il cumenzament da la stagiun ils 24 d'avust 2019. Uschia spera el da sustegn da la segunda equipa, che dat en 4. liga. Là haja fitg buns giugaders, che hajan er la qualitad da dar ballape en 2. liga.
Plinavant spera il trenader da l'US Schluein Glion ch'i gartegia tuttina anc cun in ni l'auter transfer d'in giugader dad in auter club.
RR Sportissimo