Fabiola Vincenz dat ballape, dentant betg sin pastg, mabain sin sablun e betg cun chalzers, mabain a pe blut. Ella dat beachsoccer, e quai gia dapi passa 10 onns. Per ella e sia equipa dal BSC Havana Shots Argovia cumenza la stagiun la fin da matg e dura fin mez avust. Durant quatter fins d'emna cumbattan las equipas per la qualificaziun per il final. Là vegn lura decidì tgi che daventa il campiun svizzer.
La stagiun da beachsoccer è pia bler pli curta che quella da ballape sin pastg. Per Fabiola Vincenz è quai in aspect positiv da quest sport:
Uschia hai jau era la pussaivladad da far autras chaussas la primavaira, l'atun e l'enviern.
Avant ha Fabiola Vincenz, ch'è oriunda dad Andiast, dà blers onns ballape sin pastg en l'emprima liga. Là dura la stagiun enturn nov mais e per ella tirava quai adina fitg a la lunga. Tar beachsoccer saja tut pli intensiv, declera la dunna da 35 onns.
-
Bild 1 von 3. Fabiola Vincenz (amez en blau) dat pli gugent sin sablun che sin il pastg. Bildquelle: Swiss Beach Soccer League.
-
Bild 2 von 3. La balla sa chatta tar il beachsoccer dapli en l'aria. Bildquelle: Swiss Beach Soccer League.
-
Bild 3 von 3. Fabiola Vincenz (giacca da plievgia) e sia equipa. Bildquelle: Swiss Beach Soccer League.
Autra sfida
Durant che Fabiola Vincenz deva anc ballape sin pastg, è ella stada ina giada ad in trenament da beachsoccer. Quai haja alura plaschì fitg. Suenter in pèr trenaments haja ella lura era cumenzà a dar campiunadi.
Quai era ina giada insatge auter. Ina autra tecnica, auters trenaments. Jau hai pudì emprender bler nov en curt temp.
Tar il beachsoccer dattan tschintg giugadras sin in plaz ch'è dubel uschè grond sco in plaz da beachvolley. Giugà vegn trais giadas 12 minutas. La balla è bler pli savens en l'aria, perquai ch'il sablun impedescha da pudair dar pass precis sin il plaun.
In moviment classic dal beachsoccer è per quest motiv la «bicicletta», per tudestg il «Fallrückzieher». Tar quest moviment acrobatic sajetta la giugadra la balla durant ch'ella è en l'aria, il pe e la balla èn sur il chau.
I saja pli simpel da descriver quest moviment che da far el, raquinta la dunna da 35 onns. Ella preferescha da dar in bel pass e surlascha pli gugent ad autras giugadras da marcar in gol cun la bicicletta.