Andreas Catschegn ha 32 onns, è creschì si a Cuira, è oriunds d’Andiast ed ha ina ideala postura per dar ballarait, el è 1.98 meters gronds. El ha giugà avant bun 10 onns ballarait en la liga naziunala B. Suenter è il bab da 2 uffants sa concentrà sin il beachvolley.
Quai gioga el uss anc adina, dentant betg pli uschè bler. Vitiers è el activ en l’uniun da ballarait da la Svizra orientala. Andreas Catschegn gioga er al turnier a Glion, nua che bleras e bunas giugadras e giugaders da l’entira Svizra sa mesiran:
Per nus sco regiun vali bler d’avair in uschè aut turnier en il Grischun.
Paucs club, paucas giugadras e giugaders
La scena da beachvolley en il Grischun è plitost pitschna, i dat mo paucs clubs activs ed uschia era betg bleras giugadras e giugaders.
Tar il sport da ballarait en halla vesa quai ora in zic auter, là datti dapli clubs e persunas activas. Perquai è la finamira d’Andreas Catschegn da motivar dapli giuvnas e giuvens da sa decider per il sport da beachvolley.
RR Sportissimo 17:20