Beat Clopath di adia al sport da lutga

Beat Clopath, il lutgader da Panaduz, sa retira per immediat dal sport da lutga, quai en la vegliadetgna da 32 onns.

Be in di suenter ch’el ha anc cumbattì en la lutga finala da la festa da primavaira a Seewis encunter Armon Orlik ha il lutgader da Panaduz, Beat Clopath, annunzià ch’el sa retiri dal sport da lutga. Il plaschair e la motivaziun vid quest sport saja anc adina qua, ma il temp manchia, ha Clopath ditg envers RTR. El giavischi dapli temp per sia famiglia, sias duas buobas, ed era per sia fatschenta. Clopath maina ensemen cun ses frar in’interpresa da bajegiar.

«  Il mument constat per mai entir ed entratg. »

Beat Clopath

Beat Clopath è sa mess l’emprima giada en il resgim cun 6 onns. Bun 26 onns ha el pratitgà il sport da lutga, ils davos 15 onns sin aut livel. Ussa valeva el sco il bab dals lutgaders grischuns, suenter che ses anteriurs collegas Stefan Fausch, Reto Attenhofer ed Edi Philipp avevan terminà lur carrieras. Clopath udiva pia tar quest quartet che valeva sco ina generaziun dad aur en il sport da lutga en il Grischun.

63 cranzs – 2 cranzs federals

Beat Clopath ha gudagnà en sia carriera 63 cranzs, da quai dus cranzs federals (2010 Frauenfeld / 2013 Burgdorf). En tut ha Clopath er triumfà a 9 festas chantunalas, tranter auter ha el gudagnà 5 giadas la festa da lutga grischuna-glarunaisa.

A la davosa festa da lutga federala ad Estavayer il 2016 ha il lutgader da Panaduz manchentà ses terz cranz federal be per in sulet punct. Tranter auter ha Clopath dentant cumbattì a questa festa pari cunter Christian Stucki ed uschia er franà in dals gronds favurits sin il titel da retg da lutga. Ses davos cumbat en il resgim ha Clopath pers la dumengia, ils 23 d’avrigl, en la lutga finala da la festa da primavaira a Seewis encunter ses collega d’equipa Armon Orlik.

RR Sportissimo 17:00