Il currider uranais Remo Betschart è il nov retg da las chavorgias. Il victur da la cursa da trail Transruinaulta ha er persvadì al Transviamala ed uschia gudagnà la cumbinaziun da questas duas cursas. Tar las dunnas è Michela Segalada da Winterthur stada ina classa per sa sezza. La basa per il titel da regina da las chavorgias ha Segalada mess al Transruinaulta cun gudagnar en in temp da record e cun uschia declassar l'entira concurrenza per 20 minutas e dapli.
Michele Paonne e Nina Zoller gudognan il Transviamala
Il currider dal Principadi dal Liechtenstein, Michele Paonne, ha gudagnà la cursa populara Transviamala 2017. Paonne ha duvrà per ils bun 19 kilometers da Tusaun a Donat 1:23.15 ed è uschia stà bun 45 secundas pli spert ch’il Tudestg Carsten Brod. Terz è vegnì il Turitgais Benjamin Ueltschi.
Tar las dunnas ha la mattadura locala, Nina Zoller da Cuira, gudagnà en 1:32.56 uras. Zoller è stada passa trais minutas pli sperta che Julia Bleasdale da Puntraschigna. Terza è vegnida Veronika Schanzer da Herisau.
Fabio Lechner e Barbara Jentner gudogna Transviamala curt
Il passlunghist Fabio Lechner da Cuira è stà il pli svelt en la cursa curta dal
Transviamala sur 11,5 kilometers. Lechner ha triumfà suveran en bun 51 minutas. La sperta dunna è stada Barbara Jentner dal Principadi dal Liechtenstein ch’ha la finala gudagnà il sprint final cunter Julia Bolt da Favugn.
RR novitads 14:00