Durant 10 onns han Selina (41 onns), Elisa (34 onns) ed Aita Gasparin (31 onns) fatg part communablamain a la cuppa mundiala da biatlon. Il 2022 aveva Selina, la sora gronda e pioniera da quest sport en Svizra, lura terminà sia carriera. Quest onn ha era Elisa dà adia. Aita, la pli giuvna d'ellas, è ussa pia la suletta da l'anteriur trio che cumbatta anc per plazs da podest, puncts e medaglias.
Las trais soras Gasparin avevan dumagnà insatge ch’i n’aveva anc mai dà: Gist tuttas trais èn sa participadas il 2014 als gieus olimpics a Sotschi, en la Russia. Il bab Renato aveva da lezzas uras tschertgà sponsurs per quest project cun il slogan «Drei Engel für Sotschi». Ed i ha funcziunà: Selina ha gudagnà argient e uschia scrit istorgia da biatlon.
Ina medaglia olimpica, quai è era il siemi dad Aita Gasparin che metta ils gieus olimpics ad Antholz, il favrer, dal tuttafatg en il focus.