Siglir tar il cuntegn

Header

audio
Eligius Tambornino 8avel en il sprint
Or da Actualitad dals 03.03.2022.
laschar ir. Durada: 23 Secundas.
cuntegn

Biatlon: Cuppa IBU a Lai Eligius Tambornino curra en ils top 10

A la fin da la carriera mussa Eligius Tambornino anc ina giada in ferma prestaziun. Il biatlet oriund da Trun è vegnì 8avel en l’emprima cursa da la Cuppa IBU a Lai, in sprint sur 10 kilometers. Tambornino ha fatg be in sulet sbagl cun sajettar ed uschia realisà ses meglier resultat da la stagiun.

Sin il victur, il Norvegiais Johannes Dale, ha Eligius Tambornino pers 1:24 minutas. Cun ses 35 onns è il biatlet Sursilvan stà il pli vegl a la partenza. Per el èn las cursas da la Cuppa IBU a Lai pli probabel las davosas da la carriera. En in’emna vul Eligius Tambornino ir a la partenza al maraton da l’Engiadina.

Laurin Fravi manchenta ils top 50

Betg sco giavischà en il sprint sur 10 kilometers èsi ì al matadur local, Laurin Fravi da Lantsch. El ha fatg quatter sbagls cun sajettar ed è la finala stuì sa cuntentar cun il 52avel plaz. Sin il victur ha il biatlet da 23 onns pers passa quatter minutas.

Laurin Fravi
Legenda: A Laurin Fravi n'èsi betg ì sco giavischà a sia cursa da chasa. Andreas Wieland

La sonda, ils 5 da mars spetga sin ils biatlets in super-sprint en la l’Arena da biatlon a Lantsch. La dumengia stat sin il program ina cursa da distanza sur 15 kilometers cun partenza en massa. La Cuppa IBU è suenter la Cuppa mundiala la segund’auta categoria da cursas internaziunalas da biatlon.

audio
Cuppa IBU a Lai: sprint cun Laurin Fravi da Lantsch
ord Actualitad dals 03.03.2022.
laschar ir. Durada: 3 minutas 37 Secundas.

Nagin exploit tar las biatletas svizras

Il sprint da la dunnas sur 7,5 kilometers ha gudagnà la Taliana Michela Carrara. Da las Svizra ha sulet Ladina Meier-Ruge cuntanschì in plaz sut las top 30. Ella è vegnida 29avla cun dus sbagls da sajettar ed in retard da passa duas minutas. Plinavant è Flurina Volken vegnida 35avla, Flavia Barmettler 48avla, Susanna Meinen 57avla ed Anja Fischer 61avla.

RTR actualitad 17:00

Artitgels legids il pli savens

Scrollar a sanestra Scrollar a dretga