Siglir tar il cuntegn

Header

Irene Cadurisch
Legenda: Irene Cadurisch als gieus olimpics a Peking il 2022 ch'èn ids a fin en in drama. Keystone
cuntegn

Biatlon – Cuppa IBU Irene Cadurisch sin via enavos

Dapi il drama da Peking èsi vegnì ruassaivel enturn Irene Cadurisch, la biatleta da 32 onns da Malögia. Als davos gieus olimpics era Cadurisch dada ensemen en la cursa da staffetta pervia da problems cun la circulaziun ed aveva sinaquai stuì vegnir transportada davent cun la schlieusa da salvament.

audio
Irene Cadurisch – pass per pass enavos en la cuppa mundiala
ord Actualitad dals 24.01.2024. Maletg: Keystone
laschar ir. Durada: 4 minutas 26 Secundas.

Suenter quest schoc als gieus olimpics ha Irene Cadurisch terminà per immediat la stagiun ed er la stagiun suenter, quella dal 2022/2023 ha ella manchentà dal tuttafatg. Pir dapi la stagiun actuala sa participescha ella puspè a cursas, quai en il rom da la Cuppa IBU, il segund aut stgalim da cursas da biatlon suenter la cuppa mundiala.

Cun mai vai bain, jau sun cuntenta ed jau poss puspè far cursas e quai è gia in grond pass enavant.
Autur: Irene Cadurisch biatleta cader B da Swiss Ski

Uss dovria ella simplamain pazienza. La via enavos è numnadamain stentusa, er perquai ch’ella ha gì fatg ina pausa da bun in mez onn senza trenament. Il corp n’eria simplamain betg pront, uschia la biatleta bregagliotta. Cadurisch ha silsuenter cumenzà a trenar quasi davent da nulla. Durant quella fasa ha ella er adina survegnì bler sustegn da la famiglia.

video
Discurs cun Irene Cadurisch davart il drama da Peking e ses avegnir
Or da Giuventetgna dals 24.01.2024.
laschar ir. Durada: 18 minutas 42 Secundas.

Il plaschair vi dal biatlon è memia grond per chalar

Irene Cadurisch ha er fatg patratgs da chalar, da terminar la carriera. Ma ella cumbattia gugent per ina finamira ed ella charezzia quest sport da biatlon. E motivaziun dettian er ils gronds eveniments che spetgan ils proxims onns. Il 2025 èn a Lai ils campiunadis mundials da chasa e be in onn pli tard gia ils proxims gieus olimpics a Milaun e Cortina d’Ampezzo. Ma er sch’i na saja betg pussibel dad ir a la partenza a quests proxims puncts culminants na giaja il mund betg sutsura. Ella na stoppia mussar si insatge, a nagin, uschia Cadurisch ch'aveva gudagnà als gieus olimpics il 2018 a Pyeongchang en la Corea dal Sid surprendentamain in diplom olimpic sco 8avla en la cursa da sprint.

Actualmain sa participescha Irene Cadurisch als campiunadis d’Europa da biatlon en il rom da la Cuppa IBU ad Osrblie en la Slovachia.

Actualitad RTR 11:00

Artitgels legids il pli savens