La famiglia da biatlon en l’Engiadina Bassa crescha. Tranter auter pervia dal nov implant da biatlon a Sclamischot sper Strada. Gia pli baud devi in simpel implant da biatlon giusum l’Engiadina Bassa. Dapi l’enviern passà sa preschenta quel dentant en in nov vesgtì.
La Societad biatlon Sclamischot, ch'è vegnida fundada avant dus onns, ha tschertgà e ramassar. Cun quests raps ha la societad renovà l'implant. Ussa han ils uffants e giuvenils da la regiun la pussaivladad da far lur sport preferì sin ina loipa da maximalmain dus kilometers e da trair cun il schluppet pneumatic, u cun il caliber pitschen, e quai perfin sin schibas electronicas.
Premiera cun cursas da la cuppa svizra
Per l’emprima giada organisescha la Societad biatlon Sclamischot concurrenzas naziunalas. Cun la cuppa svizra da biatlon arrivan uffants e giuvenils da l’entira Svizra per cursas en l'Engiadina Bassa. Circa 70 atletas ed atlets èn da la partida.
Fin qua hai dà sin l'implant da biatlon a Sclamischot be ina pitschna cursa regiunala. Las cursas da la cuppa svizra èn pia ina premiera.
Temperaturas bassas al di da la cursa
Malgrà las temperaturas fraidas, da passa diesch grads sut nulla, han ins vis surtut fatschas cuntentas al di da la cursa. Las atletas ed ils atlets han gì grond plaschair da pudair absolvar l'emprima cursa da la stagiun. Cun l'implant da biatlon a Sclamischot èn ellas ed els cuntents. Numnadamain saja quai ina bella loipa ed er sch'igl è tut il di sumbrivant saja quai in bel lieu, uschia il tenor da las giuvnas ed ils giuvens.
Promover il sport da biatlon
Las giuvnas atletas ed ils giuvens atlets che treneschan gia uss a Sclamischot èn intgantads dal nov implant. Uss ha els davant l’isch chasa la pussaivladad da trenar biatlon e na ston betg pli far gronds viadis cun auto per ir a trenar.
Cun organisar cursas naziunalas en l'Engiadina Bassa duai il sport vegnir anc pli attractiv - Uschia po ina ni l’autra sa decider per il sport da biatlon.