Siglir tar il cuntegn

Header

Aita Gasparin
Legenda: Aita Gasparin spera da pudair cumbatter il 2025 quasi avant ses isch-chasa per ina medaglia al campiunadi mundial. Keystone
cuntegn

Biatlon Vegn il campiunadi mundial 2025 a Lai?

Swiss Ski ensemen cun la Biatlon Arena Lai han candidà quest onn per manar atras il campiunadi mundial da biatlon 2025. Sonda, ils 14 da november, croda la decisiun al congress da l’Uniun internaziunala da biatlon IBU a Prag. Il sulet cuntracandidat da Lai è Minsk en la Bielorussia.

Ensemen cun il dossier dal campiunadi mundial 2025 èn vegnids inoltrads tar la IBU er ils documents da candidatura per prender si Lai en il chalender da la cuppa mundiala per la perioda 2022/23 fin 2025/26. Qua croda la decisiun pir il favrer 2021.

Schanza è 50:50

Sper Lai e Minsk ha anc Nove Mesto en Tschechia candidà per il campiunadi mundial 2025, ma er gia per il campiunadi mundial il 2024. Damai che Nove Mesto è il sulet candidat per manar atras quest punct culminant il 2024 vai il 2025 pia sulet pli tranter Lai e Minsk, dus novizs en il circus da biatlon. La schanza è uschia 50:50.

Per la candidatura grischuna pleda franc l’experientscha da Lai. Ils davos onns è vegnì manà atras en questa regiun pliras occurrenzas grondas, per exempel il campiunadi mundial da mountainbike, il final da la cuppa mundiala da skis, pliras etappas dal Tour de Ski u il campiunadi mundial da biatlon dals juniors al cumenzament da quest onn. Minsk, da l'auter maun, vul persvader la IBU cun lur infrastructura. Ils Belaruss han investì bler dapli en lur stadion da biatlon, ch'è strusch da cumparegliar cun l'arena a Lai.

Swiss Ski e Lai èn da buna speranza

Resguarda la IBU la regiun da Lai per il campiunadi mundial 2025 fiss quai ina premiera, anc mai è vegnì cumbattì en Svizra per medaglias en quest sport. I fiss uschia in pass istoric, in grond pass enavant per l’entira scena da biatlon en Svizra.

Per l’ina pudess la Biatlon Arena Lai organisar in dals pli gronds eveniments insumma da biatlon, quai che fiss franc il punct culminant da questa arena ch’è vegnida averta il 2014. Per l’autra dess quai pli probabel in ulteriur schlantsch al sport da biatlon che flurescha gia dapi intgins onns tar nus, er grazia a las bunas prestaziuns da las atletas e dals atlets svizzers.

Actualitad 07:00

Artitgels legids il pli savens

Scrollar a sanestra Scrollar a dretga