Swiss Ski ha communitgà il glindesdi il program. Avant bun in mais aveva il parlament da la citad da Cuira dà glisch verda al credit da 660'000 francs. Igl è pir la segunda giada che la cuppa mundiala da Big Air vegn lantschada en Svizra. L'emprima giada è quai stà il 2003 ad Arosa.
Sport, musica e cultura
Specialmain hajan ins plaschair che l'event vegnia realisà en in format da festival, ha ditg Sacha Giger, directur da Ski Freestyle, snowboard e telemarc tar Swiss Ski. Il parlament da Cuira ha approvà unanimamain il credit necessari, pequai ch'in festival cun atletas ed atlets, sco era cun musicistas e musicists da tut il mund, saja ina buna via per far pli enconuschent la citad.
Il program detaglià da sport e concerts, datti l'entschatta d'avust. Là duai er dar infurmaziuns davart bigliets, acts da musica e davart ils participants e las participantas sportivas.