Il pli grond eveniment da sport e musica en il Grischun entschaiva. Nua che l'elita mundiala da la scena da Freeski e Snowboard entschaivan lur stagiun, e nua che las grondezzas da musica termineschan la stagiun dad open airs. Igl è gia la terza ediziun da l'eveniment, uschia ch'i dat era in zic rutina tar las lavurs da bajegiar si. I sajan mintg'onn las medemas firmas che fan las lavurs, ins saja in mez di ordavant al plan, dian ils organisaturs.
Intginas adattaziuns haja tuttina dà, di René Götz. Ins haja guardà tge ch'ins possia optimar per il public. Ils highlights sajan dentant segir la tribuna e la schanza. Sisum da lezza na datti quest onn betg pli naiv, mabain mattas. Tenor Max Kaiser ch'è spezialist da pista saja quai la part che saja exponida il pli fitg al vent ed al sulegl. Ins possia uschia spargnar radund 200 meters cubics producziun da naiv per di. Ils atlets ed atletas sajan disads a questas mattas dal trenament da stad.
En general han ils organisaturs mess gronda paisa da spargnar energia. Tranter auter hajan ins gia installà avant in mais 45 panels solars sin l'areal per producir ina part da l'energia neccessaria.
Influenza da l’aura anc imprevisibla
Tenor Roman Brogli dad SRF Meteo pudessi dar il venderdis stemprads da maximalmain 70 fin 90 kilometers l’ura. Cura che quels vegnan saja anc grev di, actualmain (18.10) vesi ora sco sch’il vent fiss il pli ferm l’avantmezdi enfin mezdi. La saira pudess la fermezza ir enavos sin 50 kilometers l’ura.
Tenor il schef da sport Donald Nader stoppians adina esser preperads per talas situaziuns ad occurrenzas en il liber, quai saja nagut nov. Per il cass ch'il vent fiss memia ferma saja da restar flexibels. Quai cun per exempel spustar cursas u cun decimar il dumber da sigls. Las qualificaziuns han lieu l'avantmezdi ed ils finals la saira a partir da las 20:00. Uschia avessins avunda spazzi da spustar. En il cas ch'ins na vegniss betg da far la cursa da freeski il venderdi na fiss quella dentant betg pussibla da far la sonda. Ils organisaturs èn dentant tut en tut da buna speranza che l'occurrenza resta sco planisada. Els quintan era quest onn puspè cun rodund 30'000 visitadras e visitaders.