Al Bike maraton dal Parc naziunal ston tut las participantas ed ils participants partir da S-chanf. Il comité d'organisaziun mida il percurs dal maraton a moda drastica perquai che la previsiun da l'aura è memia schletta.
Stgars trais dis avant la partenza dal Bike maraton haja il comité d'organisaziun analisà la prognosa da l'aura ed haja prendì differentas mesiras:
- Ils 25 d'avust partan tut ils participants e las participantas da tut ils trajects e da tuttas categorias per il maraton da 47 kilometers.
- Ils posts a Scuol, Fuldera e Livigno vegnan schliads e spustads a S-chanf.
- Il ferm vent, la plievgia e las temperaturas spetgadas sforzan il comité d'agir en num da la segirezza per tut ils participants ed era dals gidanters.
Il comité d'organisaziun n'haja vis nagin'autra tscherna, deplorescha il president dal comité Claudio Durschletta.
Uschia na stuain nus betg disdir il maraton, dentant stuain nus guntgir sin in'alternativa gravanta. Nus chapin che nus trumpain blers participants e participantas motivadas. Dentant è lur sanadad il pli impurtant.
Las regurdientschas d'avant set onns fan agir
Las prognosas da quest onn mussian ina sumeglianta situaziun sco quella dal Bike maraton d'avant set onns. Là han ins manà tras il maraton e stuì rumper giu quel la finala sin tut ils trajects. Suenter han ils bikers e las bikras stuì vegnir evacuadas.
Sche las prognosas constattan – e da quai fatg stuain nus partir – na fiss la segirezza la sonda sin ils trajects alpins betg garantida. La tschajera prognostitgada impediss plinavant da pudair far sgols da salvament – quai che sto dentant esser garantì da tut temp. Suenter las experientschas dal 2011 è quai l'unica dretga decisiun
RR novitads 17:00