Per la 30avla ediziun dal Bike Maraton Lumnezia datti naginas occurrenzas extraordinarias. Quai ha il president dal comité d’organisaziun, Giusep Capeder ditg a RTR. La situaziun da corona chaschuna anc adina restricziuns, uschia ch’il comité ha desistì d’organisar occurrenzas spezialas.
E-bikes
Per l’emprima giada vegnan enturn 10 bikers a far la cursa ord concurrenza cun e-bikes . Gia tar la davosa cursa d’avant dus onns fiss quai stà pussaivel. Lura avevi dà sulet in'annunzia e quella era sa retratga avant la cursa.
L’aura fa quitads
Enfin ussa èn bun 200 annunzias per il Bike Maraton vegnidas registradas. Damai ch’il daner da start è da pajar gist avant las cursas da la dumengia, n’èsi betg cler quantas persunas che sa participeschan la finala a la cursa. La prognosa da l’aura di ch’i dettia plievgia, uschia ch'il dumber da participants po anc variar. Giusep Capeder spera che la cursa succeda senza incaps e cunzunt senza accidents.