Valposchiavo Calcio è actualmain la pli ferma squadra da ballape grischuna en las ligas pli bassas. La squadra ha gudagnà tschintg da las emprimas sis partidas dal nov campiunadi en segunda liga – be ina unica partida ha la squadra pers. Perquai salida Valposchiavo Calcio actualmain ensemen cun il FC Rüthi da la testa da la tabella.
Experientscha, voluntad e la chemia en l’equipa èn il recept da success
Dapi duas stagiuns è Valposchiavo Calcio puspè enavos en la segunda liga da ballape. En l’emprima stagiun ha l’equipa pir en l’ultima partida dal campiunadi pudì as defender da la relegaziun. La davosa stagiun ha la squadra alura gia terminà sin plazza set da la tabella ed uschia en il camp d’amez da la segunda liga. Ed uss durant la terza stagiun che l’equipa è puspè enavos en segunda liga salida ella da la testa.
Per nus è quai er ina surpraisa che nus essan a la testa da la tabella
Durant las ultimas duas stagiuns ha Valposchiavo Calcio pudì far bleras experientschas en la segunda liga. Da questas experientschas profita l’equipa uss. Vitiers vegn che la squadra ha sviluppà ina tscherta fom da gudagnar las partidas e per quai curran ils giugaders in per l’auter. En l’equipa na datti nagin che ha l’attituda dad esser in star. Mintgin curra in per l’auter ed uschia saja il success da declerar.
