I haja funcziunà bler sco giavischà ed ils resuns da las atletas ed atlets, dals trenaders, funcziunaris e visitaders sajan stads fitg positivs, uschia il CEO Jürg Capol. Il principal saja ch’els sco organisaturs cun tut ils voluntaris e gidanters hajan funcziunà bain ensemen. Quai saja er impurtant en vista a las proximas grondas occurrenzas, la cuppa mundiala il december 2023 ed il campiunadi mundial il favrer 2025.
Campiunadi mundial è in’autra dimensiun
En vista als proxims gronds events da biatlon en l’Arena a Lantsch resta dentant anc blera lavur. Oravant tut la logistica pudess anc procurar per bain inqual rumpatesta. Tant la cuppa mundiala sco er il campiunadi mundial èn tut in’autra dimensiun ch’in campiunadi d’Europa, da quai è er Stefan Engler pertschart, il cusseglier dals chantuns che vegn a presidiar en dus onns il comité d’organisaziun.
Il campiunadi mundial 2025 vegn a carmalar millis da fans en la regiun da Lai, principal fans da la Germania ed da la Scandinavia. Ils proxims mais, en vista a la cuppa mundiala en strusch in onn, stattan ils organisaturs uschia avant diversas sfidas. Co transportar tut la glieud al lieu? Nua metter sut tetg quai entir pievel? Nua laschar parcar ils autos, tut ils campiuns da las equipas ed ils camiuns da televisiun? Nua drizzar en il center da medias, las localitads da VIP eav.? Tut sfidas ch’èn da schliar il proxim temp. Jürg Capol è dentant da buna speranza che tut vegn bun.
Ir per tips e trics ad Oberhof
Per pudair vesair tge ch’i dovra tut, ed en tge dimensiun, visita il comité d’organisaziun uss il proxim campiunadi mundial da biatlon che cumenza en curt ad Oberhof en Germania. Plinavant vegnan ins franc era a profitar da las experientschas fatgas a las davosas grondas occurrenzas da sport a Lai, sco per exempel il Tour de Ski ch’ha giu lieu pliras giadas en l’arena da biatlon a Lantsch, il final da la cuppa mundiala da skis a Parpan u il campiunadi mundial da mountainbike il 2018.