Siglir tar il cuntegn

Header

cuntegn

Campiunadi svizzer da curling Elita da curling bitta sia crappa a Schlarigna

Il 50avel campiunadi svizzer da curling ha lieu quest onn a Schlarigna. Sin il glatsch dal center da sport amez Schlarigna cumbattan las 40 meglras equipas da la Svizra per la curuna dal retg da curling.

Gia per la 50avla giada sa mesira l’elita dal sport da curling tar in campiunadi svizzer. Questa ediziun da giubileum ha lieu a Schlarigna. Amez la vischnanca ha il comité d’organisaziun fatg pront tut per beneventar sportistas e sportists da l’entira Svizra. Quaranta squadras èn questa giada da la partida – ina buna part era equipas indigenas sco il CC Samedan, il CC Schlarigna ed il CC Scuol.

audio
Robin Miozzari davart il campiunadi svizzer da curling a Schlarigna
ord Actualitad dals 27.01.2022.
laschar ir. Durada: 3 minutas 6 Secundas.

Turnier cun in onn retard

Gia dapi dus onns lavura il comité d’organisaziun dal campiunadi svizzer a Schlarigna per quest eveniment. L’enviern passà n’ha l’occurrenza betg gì lieu pervia da la pandemia. Questa onn è però tut pront. Era en la vischnanca sezza dat quai bler da vesair. Uschia pon interessads sa divertir ad ina bar da naiv, u alura persequitar davent da la terrassa dal center da sport ils duels sin il glatsch. Al turnier valan las reglas da 3G.

CC Samedan e CC Scuol tar ils cun favurits

Diversas equipas indigenas èn sa chapescha da la partida tar il campiunadi svizzer en l'Engiadina. Uschia per exempel ils defensurs dal titel dal CC Samedan, alura era las equipas da Schlarigna, da Segl e dal CC Scuol. Gist Samedan e Scuol pudessan esser las equipas las pli fermas da la regiun.

Il campiunadi svizzer da curling dura trais dis. La dumengia vegnan eruids en las partidas da final ils campiuns ed uschia las reginas, u ils retgs da curling en Svizra.

RTR actualitad 17:00

Artitgels legids il pli savens