En il rom dal Swiss Bike Cup a Savognin vegn er gist cumbattì per ils differents titels da campiun svizzer da mountainbike, quai en las disciplinas cross-country e short track. A la partenza è l’entira elita svizra, tranter els er ils dus trumfs grischuns Nino Schurter e Vital Albin.
Organisatoricamain anc in zic pli pretensius
Gia il 2021, 2022 e 2023 ha il club da velo Surses organisà cursas dal Swiss Bike Cup. La finamira era adina gia da pudair organisar ina giada ina ediziun dal campiunadi svizzer, sco la presidenta Giuliana Bonifazi ha ditg envers RTR. Uss, tar la quarta runda d'organisaziun saja quai gartegia e quai fetschia grond plaschair. I muntia però er ch'i dovria anc ina giada dapli voluntaris e voluntarias, dapli infrastructura e dapli daners. Ma quai haja funcziunà bain. Che l'elita dal bike saja uss a Savognin saja in engraziel per tut la lavur prestada. E Giuliana Bonifazi è er persvasa che Savognin possia senz'auter sa mussar uschia sper destinaziuns etablidas dal bike sco Lai, Tavau, Arosa u Flem/Laax – quai senza la finamira da daventar uschè grond ma er senza vegnir recepì «be» sco pitschen vischin da Lai.
Swiss Bike Cup a Savognin
Il venderdi saira èn stadas las cursas da short track. Tar ils umens d'elita n'èn nagins Grischuns stads a la partenza. Tant Nino Schurter sco er Vital Albin sa concentreschan cumplainamein sin la cursa principala da la sonda, la cursa da cross-country sur la distanza olimpica. Il medem fan era Mathias Flückiger, Lars Forster u Fabio Püntenter.
Tar las dunnas d'elita èn pliras favuritas però sa participadas, tranter ellas Sina Frei, la campiunessa mundiala dal 2021, ch'ha gudagnà avant Nicole Koller e Ronja Blöchlinger. La Grischuna Ginia Caluori da Panaduz ha sco quarta manchentà per pauc in plaz da podest, è dentant classada gist avant Jolanda Neff.
Anina Hutter campiunessa svizra tar las U23
Per l’emprima giada insumma en questa disciplina short track èn vegnids encurunads il campiun e la campiunessa svizra en las categorias U23 ed U19. Gudagnà questa premiera tar las dunnas U23 ha la Grischuna Anina Hutter. La mountainbikera da Trimmis ha pudì sa distanziar en la runda finala da sia davosa concurrenta e triumfà avant Monique Halter e Lea Huber.
La Lumneziana Chiara Solèr da Lumbrein è daventada 7avla. Sco ella ha ditg envers RTR, saja il Schort Track nua ch'i giaja sur 20 minutas per dar tut schon insatge tut auter e betg da cumparegliar cun quellas da Cross Country. Quellas èn la sonda sur la distanza olimpica.
Nino Schurter ed il titel numer 10?
Tar ils umens d’elita vegn spetgà in cumbat tranter ils mountainbikers rutinads enturn Nino Schurter (39) u Mathias Flückiger (36) e la generaziun nova enturn Luca Schätti (25) u Fabio Püntener (25) ch’ha persvadì fitg en las davosas cursas da la cuppa mundiala cun dus plazs da podest. Sco defensur dal titel parta il Tessinais Filippo Colombo.
Far furora a Savognin vul era Vital Albin ch’ha medemamain persvadì en questa stagiun e mussà ch’el è enavos tranter ils megliers suenter la stagiun passada disgraziada.
Cumbatter ina davosa giada per il titel da campiun svizzer vul era Nino Schurter. Nov titels ha el gia gudagnà. A Savognin vul el rimnar il titel numer 10, uschè blers titels sco el ha era gia gudagnà als campiunadis mundials.
Ginia Caluori - il trumf grischun
Tar las dunnas parta cunzunt Nicole Koller sco ina da las grondas favuritas. La mountainbikera turitgaisa da 28 onns è fin ussa stada la pli constanta en questa stagiun ed ha tranter auter persvadì cun in plaz da podest en la cuppa mundiala ad Araxá, en la Brasilia.
Concurrenza survegn Koller cunzunt d’Alessandra Keller, Jolanda Neff, Sina Frei, Linda Indergand e Ramona Forchini ch’ha festivà dacurt a Leogang ses emprim plaz da podest en la cuppa mundiala. Ord vista grischuna vul Ginia Caluori da Panaduz cumbatter per in plaz da podest a questa cursa en il Surses, quasi avant l’isch-chasa.
La dumengia stattan sin il program las cursas da mountainbike dals giuvenils en las categorias U9 fin U17.