Grond success per la mountainbikera Ginia Caluori da Panaduz. En ses emprim onn tar l’elita vegn ella terza en la cursa da cross country al campiunadi svizzer a Savognin e gudogna uschia bronz. Caluori ha persvadì davent da la partenza fin l’arrivada ed è adina stada da viadi ensemen cun Sina Frei ch’ha la finala battì la Grischuna per paucas secundas e gudagnà argient.
Alessandra Keller en in’atgna liga
Campiunessa svizra en la cursa principala sur la distanza olimpica è vegnida Alessandra Keller, quai per la terza giada suenter il 2022 ed il 2023. La mountainbikera dal chantun Sutsilvania ha dictà il tempo davent da l’entschatta e distanzià gia baud l’entira concurrenza. A la fin ha Keller triumfà cun in avantatg da 1:33 minutas sin Frei ed 1:44 minutas sin Caluori. Manchentà il podest sco quarta cun in retard da gia 2:38 minutas ha Jolanda Neff.
Resultats campiunadi svizzer da MTB a Savognin
Trumpada per il duo da Tersnaus
Tar ils umens d’elita han ils dus trumfs grischuns, Nino Schurter e Vital Albin, betg pudì persvader a lur campiunadi svizzer da chasa a Savognin. Schurter ha uschia er manchentà da daventar per la 10avla giada campiun svizzer. El ha pers gia baud il contact cun la testa e la finala terminà la cursa sco 9avel cun in retard da 3:24 minutas. Anc mender èsi ì a Vital Albin, l'auter mountainbiker oriund da Tersnaus. El ha pers schizunt 5:57 minutas e stuì sa cuntentar cun il 14avel plaz.
Gudagnà ha sco l'onn passà Filippo Colombo. Il Tessinais e collega d'equipa da Schurter dastga uschia purtar vinavant il tricot cun la crusch svizra. A Savognin ha Colombo procurà per la decisiun cun in'attatga en la 5avla dad otg rundas. La finala ha el cuntanschì l'arrivada cun in avantatg dad otg secundas sin Fabio Püntener dal chantun Uri. Püntener aveva gia persvadì en las davosas cursas da la cuppa mundiala cun dus plazs da podest. Cumplettà il podest sco terz ha il Turitgais Luca Schätti. Manchentà il podest han perencunter Mathias Flückiger sco quart e Lars Forster sco 5avel.
Chiara Solèr sut las top 5
Tar las dunnas U23 ha Chiara Solèr da Lumbrein persvadì sco 5avla. La Lumneziana è uschia classada in plaz avant Anina Hutter da Trimmis che veva gudagnà il venderdi saira il titel da campiunessa svizra en la cursa da short track. Campiunessa mundiala en la categoria U23 è vegnida Fiona Schibler dal Bike Team Soloturn.
Organisatoricamain anc in zic pli pretensius
Gia il 2021, 2022 e 2023 ha il club da velo Surses organisà cursas dal Swiss Bike Cup. La finamira era adina gia da pudair organisar ina giada ina ediziun dal campiunadi svizzer, sco la presidenta Giuliana Bonifazi ha ditg envers RTR. Uss, tar la quarta runda d'organisaziun saja quai gartegia e quai fetschia grond plaschair. I muntia però er ch'i dovria anc ina giada dapli voluntaris e voluntarias, dapli infrastructura e dapli daners. Ma quai haja funcziunà bain. Che l'elita dal bike saja uss a Savognin saja in engraziel per tut la lavur prestada. E Giuliana Bonifazi è er persvasa che Savognin possia senz'auter sa mussar uschia sper destinaziuns etablidas dal bike sco Lai, Tavau, Arosa u Flem/Laax – quai senza la finamira da daventar uschè grond ma er senza vegnir recepì «be» sco pitschen vischin da Lai.
Swiss Bike Cup a Savognin
Il venderdi saira èn stadas las cursas da short track. Tar ils umens d'elita n'èn nagins Grischuns stads a la partenza. Tant Nino Schurter sco er Vital Albin sa concentreschan cumplainamain sin la cursa principala da la sonda, la cursa da cross-country sur la distanza olimpica. Il medem fan era Mathias Flückiger u Lars Forster.
Tar las dunnas d'elita èn pliras favuritas però sa participadas, tranter ellas Sina Frei, la campiunessa mundiala dal 2021, ch'ha gudagnà avant Nicole Koller e Ronja Blöchlinger. La Grischuna Ginia Caluori da Panaduz ha sco quarta manchentà per pauc in plaz da podest, è dentant classada gist avant Jolanda Neff.
Anina Hutter campiunessa svizra tar las U23
Per l’emprima giada insumma en questa disciplina short track èn vegnids encurunads il campiun e la campiunessa svizra en las categorias U23 ed U19. Gudagnà questa premiera tar las dunnas U23 ha la Grischuna Anina Hutter. La mountainbikera da Trimmis ha pudì sa distanziar en la runda finala da sia davosa concurrenta e triumfà avant Monique Halter e Lea Huber.
La Lumneziana Chiara Solèr da Lumbrein è daventada 7avla. Sco ella ha ditg envers RTR, saja il Schort Track nua ch'i giaja sur 20 minutas per dar tut schon insatge tut auter e betg da cumparegliar cun quellas da Cross Country. Quellas èn la sonda sur la distanza olimpica.
La dumengia stattan sin il program las cursas da mountainbike dals giuvenils en las categorias U9 fin U17.
