L’elita dal sport da biatlon cumbatta durant quests dis ad Oberhof en Germania per medaglias e bunas prestaziuns. Mintgin e mintgina da questas atletas ed atlets da classa ha insacura cumenzà en in club ni en ina societad da far passlung, e da far quai alura er cun in schluppet sin il dies. Uschia sco las giuvnas ed ils giuvens dal center da trenament Engiadina Nordic. Ina buna part dals uffants e dals giuvenils che treneschan en il center da trenament da l’Engiadin'Ota fan part a la partiziun da biatlon. Trais da quels pon sa participar als campiunadis svizzers da giuventetgna a Puntraschigna.
Puntraschigna è il center dal biatlon da giuventetgna
La categoria «challenger» è la categoria gist sut quella da juniors. En questa categoria sa mesiran la fin d’emna giuvnas e giuvens a Puntraschigna. Il campiunadi svizzer è per dir il campiunadi da chasa da las atletas e dals atlets dad Engiadina Nordic. Perquai vul ins sa chapescha mussar tar ils campiunadis da chasa ina buna prestaziun. Segir pon las giuvnas ed ils giuvens da l’Engiadina profitar da l’avantatg da chasa. Il campiunadi svizzer sin l’atgna loipa ed en l'agen implant da sajettar procura dentant er per in tschert squitsch.
Louisa Steiger ed Emma van der Kaaden èn a la partenza
Tranter auter cumbattan er duas biatletas indigenas per in bun resultat tar ils campiunadis svizzers da giuventetgna a Puntraschigna. Essenzial per in bun resultat è en mintga cas ina mira segira en il stan da sajettar. Sch'ins tutga en il nair, n'ha ins betg da far rundas supplementaras en la loipa da passlung.