Il CB Lumnezia perda a chasa il derbi en terza liga encunter il CB Trun/Rabius cun 1:3. Il resultat è pli cler che quai ch'il gieu è stà. Da pausa stevi 0:0. Omaduas equipas han strusch creà schanzas. In duel senza attracziun e creativitad, cun blers bals auts. Sbagls en la defensiun han la finala manà als gols. En la 60avla e 64avla minuta tutga Nico Caduff per Trun/Rabius. Curt suenter, en la 66avla minuta, vegn Andriu Alig da scursanir per ils Lumnezians al 1 a 2. Curt avant la fin sajetta Toni Cathomas anc il 3:1 per il club da la Cadi. In derbi che «n'èdefinitivamain stà nagut per l'egl», per citar il trenader da Trun/Rabius, Claudio Bundi. Il sulet ch'els possian prender a chasa, sajan ils trais puncts.
Per ils Lumnezians èsi stà in gieu dad emblidar, nua che nagut ha funcziunà. E Marco Blumenthal constatescha che dapi ch'el saja trenader dals Lumnezians haja sia equipa anc mai mussà in gieu uschè passiv e schlet. Cun ils 3 puncts gudagnads varga il CB Trun/Rabius ils Lumnezians ed èn uss cun 17 puncts sin l'8avel plaz. Il CB Lumnezia cun 2 puncts damain sin il 9avel plaz.
Sin il CB Lumnezia spetga proxima fin d'emna gia il proxim derbi. Lura arriva cun l'US Schluein Glion il nov leader en terza liga a Vella/Bual. Il club da Foppa ha battì a chasa Sargans cun 2:0. Cun quella victoria ha l'USSI stuschà giu dal tron ils da Sargans. L'US Schluein Glion è uss cun 37 puncts a la testa da la tabella.
Per ils da Trun/Rabius vai en il proxim gieu per ulteriurs impurtants puncts. Ordaifer encunter Sevelen ch'è a la cua da la tabella.
Prevista e discurs cun ils trenaders avant l'emprim derbi en la runda primavaira
Gieu 4 en la runda da primavaira en terza liga è gist l'emprim derbi sursilvan tranter Lumnezia e Trun/Rabius. In gieu sco tut ils auters era gin ils trenaders Marco Blumenthal e Claudio Bundi. Bainsavend ch'i spetga sin il plaz a Vella/Bual in'autra atmosfera sco tar auters gieus. Era cun dapli fans ed aspectaturs. La tensiun ed era las emoziuns èn pli grondas. Ils cumbats sin il plaz pli dirs ed era in pau pli grops. Il CB Lumnezia vul nizzegiar l'avantatg da chasa ed era prender revanscha per il derbi pers en la runda d'atun cun 1 a 2 encunter Trun/Rabius.
Cura che nus giugain a chasa, vulain adina tegnair tut ils puncts tar nus.
CB Lumnezia – CB Trun/Rabius è era il duel tranter vaschins en la tabella en terza liga. Ils Lumnezians èn cun 15 puncts sin l'8avel plaz. Il club da la Cadi è cun in punct damain sin il 9avel plaz.
Pitschnas chaussasa vegnan la finala a decider il gieu.
Cun la partenza en la runda da primavaira èn omadus trenaders cuntents. 3 gieus 7 puncts la bilanza dil CB Lumnezia. Quai è be 1 punct damain che quai ch'ins ha fatg durant ils 11 gieus da l'entira runda d'atun. Ina victoria, in pari ed il gieu encunter il leader da Sargans pers piz a cup (1:2) la bilanza dal CB Trun/Rabius avant il derbi e duell sursilvan.