CB Schlarigna: Duel per la testa da la tabella

Gia dapi il principi dal campiunadi en quarta liga cumbatta il CB Schlarigna a la testa da la tabella. Uss vegni tar il duel cunter Triesen.

Logo CB Schlarigna Bild in Lightbox öffnen.

Legenda da maletgs: Forsa po il CB Schlarigna far questa stagiun il pass en la terza liga. RTR, Roman Dobler

Dapi onns è il CB Schlarigna la meglra equipa da ballape en l'Engiadina. Il CB ha terminà ils campiunadis durant las ultimas stagiuns adina tranter las quatter meglras equipas da la liga. Duas giadas è Schlarigna schizunt stà vicecampiun. Era durant questa stagiun è Schlarigna puspè ina da las meglras equipas da la quarta liga. Cun ina victoria encunter Triesen savessan ils giugaders engiadinais schizunt surprender la testa da la tabella.

«  In pari cunter Triesen fiss gia positiv. »

Amos Sciuchetti
Schef da sport CB Schlarigna

San Gian Schlarigna Avrir maletg en lightbox.

Legenda da maletgs: Il CB Schlarigna tar in trenament a San Gian. RTR, Roman Dobler

La runda d’atun en quarta liga è quasi a fin. I mancan anc duas partidas. Il duel cunter Triesen e lura anc il gieu cunter Tusaun Cazas. Il CB Schlarigna vul esser a la testa da la tabella avant ch'ir en la pausa d’enviern. Lura è la motivaziun sa chapescha pli gronda da trenar durant ils mais d’enviern e sa preparar sin la fasa finala dal campiunadi.

«  Suenter buns resultats èn ils giugaders pli motivads da sa preparar sin la primavaira. »

Amos Sciuchetti
Schef da sport CB Schlarigna

Durant ils ultims onns ha il CB Schlarigna adina dà megliers gieus durant la primavaira che l'atun. Sche quai gartegia er durant quest campiunadi è l’equipa da l’Engiadin'Ota segir in candidat valabel per far il pass en la terza liga.

RR actualitad 11:30