Andrés Sanz ha 40 onns ed ha emprendì l’amulain da hockey tar l’EHC Kreuzlingen. Sco giugader ha el dà en diversas equipas da la Svizra orientala. Ils davos 11 onns tar l'EHC Son Gagl, respectiv tar l’equipa Eisbären Son Gagl. Emprimas experientschas sco trenader ha Sanz fatg tar ils juniors da l' EHC Son Gagl ed era tar la scola da hockey dal HC Eisbären. Uss èsi tenor il trenader ura da far il proxim pass.
Andrés Sanz vegn a trenar l’equipa surtut la fin d’emna. El vegn a pendular da la regiun Son Gagl en l'Engiadina Bassa. Durant l’emna vegn la squadra trenada da l’equipa cumprovada sut la batgetta da Benny Wunderer.
Dapi la primavaira a la tschertga dad in nov trenader
L’ultima stagiun dal Cdh Engiadina è stada buna. L’equipa aveva terminà la qualificaziun en segunda liga sin plazza sis ed è uschia sa qualifitgada per ils playoffs uschè baud sco ditg betg pli. Là è la squadra dentant crudada ora en l’emprima runda. Tuttina è la stagiun ida en las annalas sco buna stagiun. Er pervia che il Cdh Engiadina ha empruvà la stagiun passada in novum. La squadra era partida cun in quartet a la banda en il campiunadi. Domenic Bott, Andri Riatsch, Leo Camichel e Benny Wunderer han trenà e manà l’equipa. La primavaira han Domenic Bott ed Andri Riatsch dentant terminà lur collavuraziun sco trenaders ord motivs persunals. Uschia ch'il Cdh ha stuì ir a la tschertga d'in nov trenader. Cun l’engaschament dad Andrés Sanz è la tschertga uss stada positiva.