Era per il Cdh Engiadina e per il EHC San Murezzan cumenza puspè il nov campiunadi da hockey en segunda liga. Las duos equipas engiadinaisas van quasi cun il medem cader sco l’enviern passà en la nova stagiun. Per San Murezzan va quai da sa etablir en la part sura da la tabella. La finamira principala dal Cdh Engiadina è da restar en segunda liga.
Cdh Engiadina cun 4 trenaders en nova stagiun
L’equipa da l’Engiadina Bassa va cun in novum en la nova stagiun. Per l’emprima giada en l’istorgia da l’equipa che exista dapi passa tschuncanta onns èn gest quatter trenaders responsabels per l’emprima equipa. Il trenader da fin uss, Benny Wunderer, surpiglia las partiziuns da juniors da la squadra da l’Engiadina Bassa. Sper quai trenescha el anc ina giada durant l’emna l’emprima squadra dal Cdh Engiadina. Ils trenaments finals fan alura il nov trio Domenic Bott, Leo Camichel ed Andri Riatsch. Els trais as partan si il coaching tranter dad els. Cun duos ni trais trenaders a la banda durant ils gieus dal Cdh Engiadina è la communicaziun tranter ils trenaders essenziala. Fin uss funcziunescha quella communicaziun bain. Gia avant la stagiun han ils trais novs trenaders discus co els vulan trenar ed alura er dar ils gieus da hockey durant la nova stagiun.
EHC San Murezzan cun cader fitg stretg
Tar il EHC San Murezzan na ha quai betg dat uschia gronds midaments. Il trenader da l’emprima equipa è il medem sco la stagiun passada. Alexander Aufderklamm va en sia segunda stagiun cun l’equipa da tradiziun. El ha in contract fin dal 2024. Mo sin il post dal schef trenader da l’entira organisaziun dal EHC San Murezzan ha quai da ina midada. Suenter che Luli Riva ha bandunà l’Engiadina è l’anteriur giugader da la liga naziunala Reto Kobach vegni engaschà. Il EHC San Murezzan ha dentant era il problem dals giugaders giuvens. Las resursas da giuvens giugaders èn simplamain limitadas. Uschia è il cader era quest on fitg stretg. Cun las absenzas che vegnan a vegnir er durant il proxim enviern èsi alura grev dad esser cumpetitiv. L’equipa da l’Engiadina’Ota enconuscha dentant quests problems è sa co ir enturn cun els. La finamira è segira da giugar en la part sura da la tabella en segunda liga.
Cuira ed Arosa cun grondas ambiziuns, Partenz Signuradi profitescha
Las squadras da tradiziun Cuira ed Arosa han declerà gia avant in per stagiuns da vulair turnar en la segund auta liga da hockey svizra, la uschenumnada Swiss League. Fin uss na s’ha il giavisch sportiv anc cunfa cun las prestaziuns sin il glatsch. Cuira ed Arosa na sun anc betg sta buns da far quest pass sportiv. En vista a la nova stagiun ha Cuira dentant investi bler. Ina dunsaina giugaders na è betg pli part da l’equipa dals trenaders Reto e Jan von Arx. Tranter auter s’ha ins separà da la figura d’integraziun Andreas John.
Arosa da l’autra vart na ha betg savì investir uschia bler en novs giugaders. L’equipa che ha era l’ambiziun da far il pass ina liga pli aut ha dapli difficultads dad attrair buns giugaders sisum il Scanvetg. Era tar Arosa stat in prominent trenader a la banda. L’anteriur giugader da la National League Rolf Schrepfer va en sia terza stagiun cun il EHC Arosa.
Suenter las equipas da tradiziun HCD, Cuira ed Arosa, è l’equipa dal Partenz Signuradi la quart ferma squadra da hockey en Grischun. Pervia che surtut il EHC Cuira ha fat gronds midaments en il cader e sorti ora inqual giugader ha il HC Partenz Signuradi savì profitar. L’equipa dal Partenz ha per exempel surprendì l’anteriur trenader da Cuira Tomas Tamfal ed era l’anteriur capitani Andreas John.