Per Elena Hartmann èsi ina premiera. La sportista da 31 onns che deriva dal triatlon ha mess questa stagiun tut sin la disciplina ciclissem. Suenter ils buns resultats fin uss dastga la Grischuna parter al campiunadi mundial en l’Australia tant en la cursas cunter l’ura (18-09) sco er a la cursa da via (24-09).
Campiunessa svizra 2022
La fin zercladur è Elena Hartmann vegnida a Steinmaur en il chantun da Turitg campiunessa svizra en la cursa cunter l’ura. Al campiunadi d’Europa a Minca mez avust ha ella terminà la cursa cunter l’ura sco 9avla sut las top 10, ina finamira ch’ella ha er per il campiunadi mundial a Wollongong. Ina medaglia na saja betg realistic, uschia Hartmann ch’ha fatg il viadi vers l’Australia cun in immens plaschair. Ina da las grondas favuritas è però sia collega d’equipa e cumpatriota Marlen Reusser ch'è daventada a Minca per la segunda giada en roda campiunessa d’Europa en la cursa cunter l’ura. Als davos gieus olimpics il 2021 a Tokyo aveva Reusser gudagnà en questa disciplina argient.
Oriunda da Domat
Elena Hartmann viva oz a Baar en il chantun da Zug. Ella saja dentant cun cor ed olma Grischuna. La mamma è Lumneziana, il bab deriva dal Partenz e creschida si è Elena Hartmann a Domat. Cun la mamma e cun ina buna amia da scola discurria ella anc oz rumantsch.
