Nina Zoller, la campiunessa mundiala da duatlon, ha gudagnà la cursa da 117 kilometers cun bunamain 3’000 meters differenza d’autezza ch’ha manà da Lantsch sur il Pass da l’Alvra ed il Pass dal Güglia enavos a Lantsch en in temp da 4:06.15 uras.
La sportista da Cuira da 33 onns è stada bunamain 18 minutas pli sperta che Sarah Tihanyi da Niederteufen en il chantun Appenzell Dadora. Cumplettà il podest sco terza ha Tanja Blickenstorfer da Horgen en il chantun Turitg.
Victoria austriaca tar ils umens
Tar ils umens ha gudagnà l’Austriac Patrick Hagenaars. El ha duvrà per ils 117 kilometers 3:38.44 uras ed è uschia stà passa duas minutas pli sperts che Andrea Bricalli da Cuira. Terz è vegni Dominik Salcher, in ulteriur austriac.
Nagina cursa roiala
Pervia da la situaziun actuala da corona n’han ils organisaturs da la cursa da velo Alpen Challenge curt avant la partenza betg survegnì la lubientscha dad ir sur cunfins. Uschia ha la cursa roiala, ch’avess manà sur passa 190 kilometers da Lantsch sur il Pass da l’Alvra, il Pass Malögia vers Chiavenna ed enavos sur il Pass dal Spleia a Lantsch, stuì vegnir annullada. Cunquai èn tut ils participants stads sfurzads da sa participar a la cursa curta. Tut en tut èn stads a la partenza a questa 21avla ediziun da l'Alpen Challenge 603 ciclists e 70 ciclistas.