Per il Club da velo Surselva è Pasca stà quest onn sco Nadal. Ils commembers dal Club han survegnì novs tricots da velo. Ils novs tricots èn per gronda part blaus cun in zic nair ed oransch. Il spezial vid quests tricots sa chatta dentant sin il dies: ina suttascripziun dal campiun mundial e campiun olimpic Nino Schurter.
A chaschun d’ina festa a Glion han intgins commembers dal Club da Velo Surselva preschentà lur novs tricots. Igl è l’otgavel tricot dal Club ch’è vegnì fundà il 1980. Cun il davos tricot èn ils commembers ids durant quatter onns a la partenza. A partir da questa stagiun sa preschentan ils mountainbikers sursilvans pia en novas colurs.
Trenament cun il grond idol
A la preschentaziun dals novs tricots ha il Club er envidà Nino Schurter ch’ha mess la basa per sia carriera tar il Club da velo Surselva. Schurter ch’è per in e scadin commember dal club il grond idol ha durant bun in’ura trenà cun ils uffants dal Club da velo Surselva. Silsuenter è el stà a disposiziun per autograms e fotografias. Era sch’il temp manchia savens fetschia el adina puspè gugent ina visita a ses Club da chasa a Glion, uschia Nino Schurter. Ed el saja sa chapescha losch da sia suttascripziun, ses autogram sin mintga tricot dal Club.
RR sportissimo 17:00