Currer, ir cun velo, raiver e far turas da skis – quai è il mund da Nina Zoller. E dapi intgins onns es ella er da chasa tar l’elita mundiala da duatlon. Trais giadas è Zoller gia sa participada a campiunadis mundials da duatlon, trais giadas cun success. Suenter ch’ella è mintgamai vegnida quarta il 2017 ed il 2018 hai tanschì per la medaglia dad aur il 2019. Suenter in onn interrupziun pervia da la pandemia da corona vegn puspè cumbattì per quest titel a Zofingen ch’organisescha dapi passa 10 onns quest campiunadi mundial.
Jau hai pir cun il temp realisà tge muntada ch’in tal titel da campiunessa mundiala ha e tge renum che quai chaschuna.
Nina Zoller parta sco ina da las favuritas a questa cursa da 10 kilometers currer, 150 kilometers cun velo da via ed anc ina giada currer 30 kilometers. Ma la sportista che lavura a Cuira sco geologa n’è betg sa preparada specific sin quest punct culminant. Ella n’ha nagin plan da trenament. El trenescha tut tenor gust e plaschair. Ma ella sa participescha a quasi tut las cursas pussiblas, gest en la regiun. Ed il pli savens terminescha ella quellas sin il podest, savens il pli sisum. La gronda sfida tar il duatlon da Zofingen è da parter en bain las forzas, la cursa cuzza numnadamain passa set uras.
