Nino Schurter, campiun mundial e campiun olimpic, parta questa dumengia suentermezdi sco grond favurit a la cursa d'elita da la cuppa mundiala da cross-country avant ses fans da chasa a Lai.
Finamira clera: Victoria numer 4 a Lai
Tant a Nove Mesto en Tschechia, sco er ad Albstadt en Germania e la davosa fin d’emna ad Andorra è Nino Schurter stà ina classa per sasez. El ha dominà las emprimas trais cursas da la cuppa mundiala en questa stagiun ed uschia demonstrà sia gronda classa.
Triumfar vul Nino Schurter sa chapescha er a la suletta cursa da la cuppa mundiala en Svizra ed uschia er repeter la victoria da l’onn passà. La cursa d’elita cumenza la dumengia a las 14:45.
Bilantscha maschada per ils 3 rumantschs en la cursa U23
La dumengia avantmezdi eran las cursas da l'U23. Far furora a Lai vulevan er ils trais anteriurs mountainbikers dal Club da velo Surselva. Quai è gartegià be per part: Vital Albin da Tersnaus ha finì la cursa sin la buna 22avla plazza, Andrin Beeli da Sagogn è rivà sin plazza 51 ed Ursin Spescha da Sevgein ha stuì terminar la cursa avant.
Vital Albin, il newcomer grischun da l’onn, resta il grond trumf. Sia finamira era ina plazza en ils emprims 20. Quella ha el manchentà pir en l'ultima runda, nua ch'el ha stuì laschar sa surpassar anc dad auters curridurs. Albin è vegnì segund-meglier svizer suenter Yoris Ryf (14avla plazza).
Pirmin Capaul - mecanist rumantsch
Per avair success en las cursas da mountainbike na sto betg be constar la furma, mabain er il material. Responsabels per quel èn ils mecanists, las bunas olmas dals mountainbikers.
Dapi quest onn è Pirmin Capaul da Lumbrein mecanist dal nov team «development MTB Team», in’equipa che metta gronda paisa sin ciclists sut 23 onns. Tranter auter è Pirmin Capaul er il mecanist d’Andrin Beeli da Sagogn.
RR actualitad 11:10++
