Siglir tar il cuntegn

Regiunal Cuira e Domat sin curs, Schluein-Glion en la miseria

Suenter il return en la segunda liga regiunala èsi grategià a Cuira 97 da confirmar, ch’els audan en questa liga. Ch’els na s’audan betg en la terza liga, han ils da Domat mussà fin ussa. Els domineschan lur gruppa. Entant è Schluein-Glion puspè en il cumbat cunter la relegaziun.

giugaders da Schluein-Glion festiveschan in gol.
Legenda: En la runda d’atun n’han ils giugaders da Schluein-Glion betg pudì festivar blers gols da lur squadra. MAD

Suenter che l’equipa da Cuira 97 era crudada entaifer 2 onns 2 ligas pli bass, han els fatg la stagiun passada il pass enavos en la segunda liga interregiunala. Ed en la runda d’atun han els mussà, ch’els han la qualitad da giugar là. Els van ella pausa d’enviern tranter ils emprims 6 da la tabella.

Domat marscha atras

Dals 11 gieus en la runda d’atun han ils da Domat gudagnà 9 e giugà duas giadas remis. Els van sco cler numer 1 en la pausa d’enviern ed èn sin buna via da returnar en la segunda liga regiunala.

Cumbatter fitg per pudair restar en questa segunda liga regiunala ston ils da Schluein-Glion. Els han sulet recaltgà 6 puncts en l’entira runda d’atun ed èn sut il stritg, pia sin in plaz da relegaziun. Ils Sursilvans han gì gronds problems pervia da blessuras ed absenzas durant la runda d’atun.