Siglir tar il cuntegn
Inhalt

Regiunal Cuira gudogna suenter penalties Cuppa grischuna

En in crimi da partida e penalties ha Cuira 97 la finala gudagnà la Cuppa grischuna 2018. I avess però era pudì vegnir auter, sche l'A.S. Moesa avess realisà ina da las schanzas - surtut a la fin dal temp regular.

Senza il goli e capitani Nicola Hartmann n'avess Cuira 97 betg gudagnà. L'emprima mesadad ha sia squadra bain dominà e finì cun 2:0. Quai cun omadus gols aifer 3 minutas. La 32avla minuta ha Girom Affolter mess in penalti en la rait e la 34avla ha Mitko Gjorglievski fatg il gol. Ed era cun sajettar penaltis èsi stà el ch'ha tegnì il penalti decisiv ch'ha manà a la victoria cun 5:4 (tar resultat regular 2:2), cunquai che la prolungaziun n'ha purtà nagins gols.

Moesa manchenta la victoria

La segunda mesadad ha l'A.S. Moesa però fatg squitsch e marcà il 2:2 enfin la fin dal temp regular. Ron Cereghetti – la partenza da las bleras acziuns dals Moesans – ha realisà il penalti en la 47avla minuta e Samuele Kronauer ha egualisà la 67avla minuta. Las ultimas secundas da la segunda mesadad han ils Grischun-talians manchentà 2 schanzas per decider il gieu.


AVANT IL FINAL

Cuira 97 ha gudagnà en il mezfinal cunter il Puschlav en in ver gieu da crimi. Suenter 120 minutas era il gieu gulivà. En la lutga da penaltis ha il goli da Cuira alura tegnì trais sajets dals giugaders da Puschlav ed uschia decidì il gieu.

La AS Moesa ha gudagnà il mezfinal cunter l'US Schluein Glion cun 1:0, quai grazia ad in gol en l’emprima minuta.

Cuira 97 II – in'equipa cun in fitg bun spiert d’equipa

La segunda equipa da Curia dat dapi plirs onns gia en terza liga.

Edin Durmisi
Legenda: Edin Durmisi dat dapi bun dus onns cun la secunda equipa da Cuira 97. Cuira97
Nus vulain per tut pretsch quest buccal.
Autur: Edin Durmisigiugader da Cuira 97

Il pli impurtant tar nus è d'avair plaschair cura che nus essan sin il plaz, di Edin Durmisi che gioga dapi duas stagiuns tar la secunda equipa da Cuira 97. Quai sa mussa era sin il plaz. Els dattan in ballape cultivà ed emprovan adina da tegnair il bal en las atgnas retschas.

La pli gronda fermezza dad els saja dentant il spert d’equipa, di il giuven da 19 onns. Tut ils giugaders èn tranter 17 e 22 onns e tuts tiran adina vid la medema suga.

AS Moesa – l'equipa in zic nunenconuschenta

L’equipa dal sid dal chantun tutga tar la federaziun da ballape dal Tessin e betg tar quella dal Grischun. Quai pervia da motivs geografics. Uschia sa mesira l'AS Moesa mo durant la Cuppa Grischuna cun equipas dal chantun.

Nus essan in'equipa che vul dar in ballape cultivà.
Autur: Jeremy Pfisterertrenader assistent da Moesa

En il Tessin è Moesa in’equipa da tschep da la terza liga. Gia dapi blers onns dat Moesa en questa liga senza avair fatg il pass en ina liga pli auta u pli bassa. Sco quai ch'il trenader assistent Jeremy Pfisterer di, saja la finamira dad els adina da dar in ballape cultivà e na betg mo da currer e cumbatter.

Il grond «star» da l'AS Moesa è Ron Cereghetti (36), che ha gia dà ballape en la Challenge League.

RR Sportissimo 17:00