Per l'emprima giada en l'istorgia da la Cuppa grischuna da las dunnas datti il final tranter Cuira 97 ed il CB Domat. Omaduas equipas giogan actualmain en la 2. liga. Cuira 97 sa tegn amez la tabella. Las giugadras da Domat èn sin l'ultim plaz e cumbattan encunter la relegaziun. Per cuntanscher il final han omaduas equipas però mussà prestaziuns remartgablas.
RTR vegn ad emetter ils dus gieus finals dals 29-05 sco livestream sin www.rtr.ch e natiralmain era sin nossa app gratuita Play RTR.
- 12:30 final dunnas
- 16:30 final umens
Suenter ils finals chattais vus là tut ils highlights, intervistas ed impressiuns.
Emprim final da la Cuppa Grischuna tranter Cuira 97 e Domat. E quai l'emprima giada en il nov stadion sin la Obere Au a Cuira. Ed aprpos emprima giada. Las dunnas dal club da Cuira 97 èn stadas las pli emprimas victuras. Anno 2011, cura che la Federaziun grischuna da ballape ha introducì il format da la Cuppa era per las dunnas, han ellas gudagnà il pocal. Dapi lura è anc in ulteriur titel vegnì tiers. Ed uss survegn l'equipa da la chapitala la proxima schanza.
En l'istorgia da la Cuppa grischuna da las dunnas èsi stedi vegnì tar il final tranter Domat e Tusaun/Cazas. Ils ultims 10 onns hai dà 8 giadas quest duel. E be ina solia giada èsi reussì a las giugadras da Domat da turnar a chasa cun titel e pocal. Quai è stà avant 4 onns. Uss survegnan ellas in'ulteriura schanza. E quella giada na encunter lur adversarias da tema da Tusaun.
Qualificaziun a moda d'in pitschen turnier
La qualificaziun per il final da la Cuppa grischuna è ils ultims onns adina succedida en differentas furmas. Questa stagiun han sis equipas cumbattì per las duas plazzas da final. Las sis equipas èn vegnidas partidas en duas gruppas da trais. Il victur da mintga gruppa è lura sa qualifitgà per il final dals 29 da matg. Qua chattais la survista:
Gruppa A:
- CB Vaz Sut (3. liga) 1:4 CB Domat (2. liga)
- CB Vaz Sut 4:0 CB Schlarigna (4. liga)
- CB Domat 11:0 CB Schlarigna
Cun 6 puncts ord dus gieus è il CB Domat sa qualifitgà per il final.
Gruppa B:
- Team Surselva (4. liga) 0:7 CB Tusaun/Cazas (2. liga)
- Team Surselva 1:3 Cuira 97 (2. liga)
- Cuira 97 3:0 CB Tusaun/Cazas
Cun 6 puncts ord dus gieus è Cuira 97 sa qualifitgà per il final.
Uschia vegni quest'onn tar ina premiera en la Cuppa grischuna. Per l'emprima giada en l'istorgia vegni tar il derbi tranter il CB Domat e Cuira 97. Las anteriuras dominaturas da la Cuppa grischuna, Tusaun/Cazas, han fin ussa gia gudagnà 10 giadas il buccal - questa giada però manchentà il sigl en il final.
En ils dus gieus da campiunadi tranter las duas equipas finalistas hai dà cleras victorias. En la runda d'atun ha Cuira 97 gudagnà cun 5:1. En la runda da primavaira han las ballapedistas da Domat prendì revantscha. Ellas han gudagnà - era cun 5:1.
Tut ils finals da la Cuppa Grischuna da dunnas
| ONN | VICTUR | FINALIST | Resultat |
|---|---|---|---|
| 2024 | CB Tusaun/Cazas | CB Domat | 1:0 |
| 2023 | CB Tusaun/Cazas | CB Domat | 0:0, 5:3 suenter penaltis |
| 2022 | CB Tusaun/Cazas | Cuira 97 | 3:0 |
| 2021 | CB Domat | CB Tusaun/Cazas | 1:1, 5:3 suenter penaltis |
| 2020 | Nagin final pervia da corona | ||
| 2019 | CB Tusaun/Cazas | CB Domat | 2:0 |
| 2018 | CB Tusaun/Cazas | CB Domat | 3:0 |
| 2017 | CB Tusaun/Cazas | CB Domat | 3:0 |
| 2016 | CB Tusaun/Cazas | CB Domat | 2:2, 7:6 suenter penaltis |
| 2015 | CB Tusaun/Cazas | CB Domat | 2:0 |
| 2014 | Cuira 97 | CB Tusaun/Cazas | 3:0 |
| 2013 | CB Tusaun/Cazas | Cuira 97 | 3:0 |
| 2012 | CB Tusaun/Cazas | Cuira 97 | 2:1 |
| 2011 | Cuira 97 | CB Tusaun/Cazas | 3:2 |