Per l'emprima giada en l'istorgia da la Cuppa grischuna da las dunnas sa scuntran Cuira 97 ed il CB Domat en il final. Omaduas equipas giogan actualmain en la 2. liga, nua che Cuira 97 è da chattar amez la tabella ed il CB Domat sin l'ultim plaz da la tabella - pia sin in plaz da relegaziun. Per cuntanscher il final han omaduas equipas però mussà prestaziuns remartgablas.
Qualificaziun a moda d'in pitschen turnier
La qualificaziun per il final da la Cuppa grischuna è ils ultims onns adina succedida en differentas furmas. Questa stagiun han sis equipas cumbattì per las duas plazzas da final. Las sis equipas èn vegnidas partidas en duas gruppas da trais. Il victur da mintga gruppa è lura sa qualifitgà per il final dals 29 da matg. Qua chattais la survista:
Gruppa A:
- CB Vaz Sut (3. liga) 1:4 CB Domat (2. liga)
- CB Vaz Sut 4:0 CB Schlarigna (4. liga)
- CB Domat 11:0 CB Schlarigna
Cun 6 puncts ord dus gieus è il CB Domat sa qualifitgà per il final.
Gruppa B:
- Team Surselva (4. liga) 0:7 CB Tusaun/Cazas (2. liga)
- Team Surselva 1:3 Cuira 97 (2. liga)
- Cuira 97 3:0 CB Tusaun/Cazas
Cun 6 puncts ord dus gieus è Cuira 97 sa qualifitgà per il final.
Uschia vegni quest'onn tar ina premiera en la Cuppa grischuna. Per l'emprima giada en l'istorgia vegni tar il derbi tranter il CB Domat e Cuira 97. Las anteriuras dominaturas da la Cuppa grischuna, Tusaun/Cazas, han fin ussa gia gudagnà 10 giadas il buccal - questa giada però manchentà il sigl en il final.
En ils dus gieus da campiunadi tranter ils dus finalists hai dà duas giadas cleras victorias. L'emprim gieu l'atun ha Cuira 97 gudagnà cun 5:1. Questa primavaira è dentant gartegiada la revantscha a las ballapedistas da Domat. A chasa han ellas gudagnà - era cun 5:1.
Tut ils finals da la Cuppa Grischuna da dunnas
| ONN | VICTUR | FINALIST | Resultat |
|---|---|---|---|
| 2024 | CB Tusaun/Cazas | CB Domat | 1:0 |
| 2023 | CB Tusaun/Cazas | CB Domat | 0:0, 5:3 suenter penaltis |
| 2022 | CB Tusaun/Cazas | Cuira 97 | 3:0 |
| 2021 | CB Domat | CB Tusaun/Cazas | 1:1, 5:3 suenter penaltis |
| 2020 | Nagin final pervia da corona | ||
| 2019 | CB Tusaun/Cazas | CB Domat | 2:0 |
| 2018 | CB Tusaun/Cazas | CB Domat | 3:0 |
| 2017 | CB Tusaun/Cazas | CB Domat | 3:0 |
| 2016 | CB Tusaun/Cazas | CB Domat | 2:2, 7:6 suenter penaltis |
| 2015 | CB Tusaun/Cazas | CB Domat | 2:0 |
| 2014 | Cuira 97 | CB Tusaun/Cazas | 3:0 |
| 2013 | CB Tusaun/Cazas | Cuira 97 | 3:0 |
| 2012 | CB Tusaun/Cazas | Cuira 97 | 2:1 |
| 2011 | Cuira 97 | CB Tusaun/Cazas | 3:2 |