La US Schluein Glion è ina runda vinavant en la cuppa Svizra da ballape. L’equipa da la segunda liga ha gudagnà il duel sursilvan ordaifer encunter il CB Trun/Rabius che dat en la terza liga cun 2:0. L'equipa da la Foppa ha uschia er mussà ch'ella è e resta il numer 1 en Surselva. En in gieu da test avant en vista a la nova stagiun aveva Trun/Rabius anc battì Schluein Glion.
Schluein Glion ha oravant tut persvadì avant pausa. Er omadus gols ha l'equipa da segunda liga sajettà en l'emprima mesadad. Suenter pausa ha Trun/Rabius dictà pli e pli fitg il gieu. Mo malgrà intginas bunas schanzas da gol n'èsi betg reussì a l'equipa da chasa da sajettar in gol.
Paucs dis avant questa terrada encunter Schluein Glion aveva Trun/Rabius gia pers il quartfinal da la cuppa grischuna encunter Tusaun/Cazas suenter sajettar penaltis.