Uss sun jau cuntent che jau poss cumenzar mia nova vita
Quai di Curdin Perl suenter sia lunga carriera sco passlunghist da professiun. Cumenzà ha tut avant passa 20 onns a Puntraschigna. Perquai che sia sora gronda Nadja ha cumenzà cun il sport da passlung, ha er Curdin decis d'empruvar cun passlung. Curdin Perl ha emprais l’amulain dal sport da pitschen ensi ed ha adina fatg il proxim pass. L’emprim en il cader da passlung grischun, e lura era en il cader naziunal da juniors.
Cun 16 onns ha l’anteriur passlunghist cumenzà cun ses giarsunadi da marangun che el ha era terminà. Parallel al giarsunadi ha Perl dentant adina er fatg ses sport. E l’emprima giada ch'el ha fatg furora è stà tar il campiunadi mundial da juniors l’onn 2004 a Stryn en Norvegia. Là ha Perl gudagnà surprendentamain la medaglia d'argient en la cursa da 30 kilometers en il stil classic. Gia da questas uras eran Alexey Poltoranin, Martin Johnsrud Sundby e Marcus Hellner da la partida.
Il pass dals juniors tar l’elita
A partir da la stagiun 2006/2007 è Curdin Perl adina era stà part da la cuppa mundiala da passlung. A partir da quest mument era il passlunghist da Puntraschigna sportist da professiun, ed ha pudì viver da ses sport. L’emprim è quai gartegià a Curdin Perl fitg bain da far il pass en la cuppa mundiala da passlung, suenter lura ha era el stuì cumbatter cun feridas.
Emprim punct culminant a La Clusaz
Ensemen cun la staffetta svizra cun Dario Cologna, Toni Livers e Remo Fischer ha Curdin Perl festivà sia emprima ed unica victoria en la cuppa mundiala. L’equipa Svizra ha gudagnà la cursa da staffetta sur 4x10 kilometers. A partir da quest mument è il sport da passlung en general vegni percepì da la publicitad bler pli intensiv sco avant. L’ultim success svizzer en il sport da passlung era passa 20 onns vegl.
La victoria a La Clusaz era il medem mument er il principi dal meglier temp da Curdin Perl en la cuppa mundiala. Mo in onn suenter ha il passlunghist da Puntraschigna terminà la seria da cursas dal Tour de ski sco quart. El era pia arrivà tranter ils megliers dal mund.
Emprima gronda ferida e nagin campiunadi mundial
Curt avant il campiunadi mundial ad Oslo en Norvegia era Curdin Perl en la furma da sia vita. Anc mai avant e suenter la quarta plazza dal Tour de ski sa sentiva Perl uschè bain. Tenor quai eran las aspectativas grondas dad ir al campiunadi mundial en la tgina dal sport nordic en Norvegia.
Tar il trenament a San Murezzan ha Curdin Perl dentant subì ina ruttadira da las eglias. Da quella ferida na s’ha el mai pli propi recreà. La ferida curt avant Oslo ha fatg mal, surtut en il chau. Dapli lura n'eri per Curdin Perl betg pli pussaivel da vegnir anc ina giada sin il medem livel.
Fin da la carriera durant il Tour de ski
Gia avant l’ultim enviern ha Curdin Perl detg che questa stagiun saja sia ultima. Anc durant il Tour de ski ha el decis da chalar en la cuppa mundiala, e da far mo pli cursas popularas. L’anteriur spezialist da distanzas lungas ha gudagnà anc la cursa da Planoiras a Lai, La Sfida en Engiadin’Ota, e per finir era Perl anc terz da la cursa da notg dal maraton da skis engiadinais.
Uss è la carriera da l’anteriur passlunghist da professiun a fin. En l'avegnir vul el dar vinavant sias experientschas, en furma da champs da trenament per passlunghists che han l'ambiziun da far buns resultats.
RR actualitad 07:00