Siglir tar il cuntegn

Header

video
L'Engiadin'Ota vul daventar il Mecca per cursas d'orientaziun
Or da Telesguard dals 19.06.2020.
laschar ir
cuntegn

Cursa d'orientaziun Cun charta e cumpass a la tschertga da posts

L’elita naziunala dal sport da cursa d’orientaziun trenescha per il mument en Engiadina. En grischun chatta l’equipa naziunala cundiziuns perfetgas.

Durant in entir mais trenescha l’equipa naziunala da cursa d’orientaziun en Engiadina. Era en quest sport èn tut las cursas internaziunalas vegnidas stritgadas u spustadas. I na dat nagin campiunadi mundial ed era betg cursas da la cuppa mundiala. Tuttina filan las atletas ed ils atlets da cursa d’orientaziun vi da lur furma. En Engiadina ha l’equipa naziunala cundiziuns da trenament perfetgas. Guauds, planiras, dentant era terren pli crappus u vias champestras, tut è davant isch chasa.

Novas chartas da cursa d’orientaziun per la regiun

Ensemen cun spezialists da cursa d’orientaziun ha il Club da cursa d’orientaziun da l’Engiadina realisà novas chartas da sprint per la regiun da l’Engiadina, da la Bregaglia e la Val Poschiavo. Questas chartas èn vegnidas realisadas ed omologadas per il diever general. Las chartas èn fitg impurtantas per il sport nua ch'ins tschertga cun charta e cumpass ils differents posts ch'èn da passar. Sper las novas chartas nua ch'ins po metter individualmain ils differents posts che las curridras ed ils curriders han da chattar datti perfin chartas cun si gia ils posts. Quai surtut en las regiuns da las pendicularas sco per exempel a Muottas Muragl. Davent da la staziun da muntogna datti la pussaivladad da currer trais differentas distanzas e da passar uschia maximalmain quindesch posts.

Cursa sco part dal champ da trenament

Per tuttina avair anc in zichel il sentiment da concurrenza ha l’equipa naziunala organisà a curta vista ina cursa. Questa cursa sa numna «La chasse neutrass». Las emprimas trais etappas èn la fin d’emna a Lavin a Sent ed a Ftan. Il final da la cursa spetga la proxima fin d’emna en il chantun Berna.

RTR actualitad 12:00

Artitgels legids il pli savens

Scrollar a sanestra Scrollar a dretga