L’agen vitg enconuschan scolaras e scolars sco l’atgna giaglioffa. Ils uffants as divertan per exempel cun giugar a zup en las streglias e giassas dal vitg. Uschia enconuschan els tut ils lieus, ed i n'è betg difficil per els da s’orientar. Pli pretensius è quai, sch'ins ha da tschertgar differents posts e lieusu en il vitg cun ina charta geografica. Precis uschia funcziunescha la cursa d’orientaziun.
Animar scolaras e scolars da far cursa d’orientaziun
La cumbinaziun currer ed orientaziun aveva ina tscherta tradiziun en l'Engiadina Bassa. Cursas d’orientaziun per scolaras e scolars ha quai gia dà pli baud. Lura è quai dentant vegnì pli quiet enturn il sport da Simone Niggli e Daniel Hubmann. Dapi intgins onns emprov’ins puspè da popularisar quest sport. La cursa d’orientaziun per scolaras e scolars è l’emprova da mussar quest sport a giuvnas e giuvens.
-
Bild 1 von 5. Persvader giuvnas e giuvens da quest sport è la finamira centrala dals organisaturs a Sent. Bildquelle: RTR, Roman Dobler.
-
Bild 2 von 5. Anteriura curridura Annelies Meier declera. co che la cursa d'orientaziun funcziuna. Bildquelle: RTR, Roman Dobler.
-
Bild 3 von 5. Scolaras e scolars da Sent e Scuol dattan tut. Bildquelle: RTR, Roman Dobler.
-
Bild 4 von 5. Barattar experientschas a la cursa d'orientaziun da Sent. Bildquelle: RTR, Roman Dobler.
-
Bild 5 von 5. Tut che spetga sin la rangaziun da la cursa. Bildquelle: RTR, Roman Dobler.
Scolaras e scolars da Sent e Scuol tar la cursa d’orientaziun a Sent
Circa in trentina d'uffants da l’emprima fin tar la quarta classa da Sent e da Scuol han fatg part a la cursa d’orientaziun a Sent. L’emprim han ins mussà a las scolaras ed ils scolars, co ch’els duain leger la charta, e tge ch'ils differents simbols sin la charta muntan. Alura ha quai dà la chaschun da testar ina tala cursa, avant ch'i vegnia serius cun la cursa enturn Sent. Igl è stà da vesair e sentir che las scolaras ed ils scolars han gì gust da la cursa d’orientaziun.