Gist cun l’entschatta da la crisa da corona han ils organisaturs da la cursa da stad en Engiadin'Ota decis dad annullar la cursa. Cun l'ir da las emnas e la situaziun ch'è sa meglierada han ins l’emprim decis dad organisar la cursa Vertical. Ina cursa da currer da San Murezzan, 9 kilometers amunt, fin tar la partenza da la cursa rapida al pe dal Piz Nair. Cun las ulteriuras schluccadas han ins lura er ponderà da puspè far las cursas da currer giu la val. La tradiziunala, 22 km da Segl a Samedan, ed era la cursa dad 8 km da Samedan a Puntraschigna.
Currer sut il concept da segirezza
I sa chapescha ch'era ils organisaturs da la cursa da stad en Engiadin'Ota han stuì far in concept da segirezza. Quel prevesa mesiras d’igiena, lura era da distanza e nua che quai n'è betg pussibel l’obligatori da purtar ina mascrina. Vitiers vegn, ch'ins na vul betg ina cumulaziun da glieud. Tar la partenza datti blocs nua che mo 300 persunas dastgan esser. Durant la cursa vegn servida l’alimentaziun, e suenter en l’arrivada na datti betg ina gronda ceremonia. Mintga curridura e mintga curridur duai bandunar l’areal da l’arrivada pli spert pussaivel per evitar che blera glieud sesa anc da cumpagnia.
Suenter il record ina ediziun speziala
La cursa da stad en l’Engiadin'Ota datti dapi il 1979. La cursa ha pudì festivar la stad passada cun passa 2’500 curriduras e curridurs in nov record. Questa giada na datti segir betg novs records. Perquai va l’ediziun 2020 segir en l’istorgia sco «special edition».