Per l’emprima giada han ins organisà en la regiun da l’Engiadina Bassa ina cursa da trail running – la uschè numnada cursa Engiadina Scuol Trail. La cursa roiala da l’occurrenza è la cursa «Alvetern» che maina sur 54 kilometers ed ha 3’200 meters differenza d’autezza. La cursa media era ina cursa sur 20 kilometers cun 1’200 meters differenza d’autezza, e la cursa curta era ina cursa per uffants sur 6 kilometers.
Impressiuns Engiadina Scuol Trail
-
Bild 1 von 4. Engiadina Scuol Trail. Bildquelle: RTR, Roman Dobler.
-
Bild 2 von 4. La pausa meritada en l'arrivada. Bildquelle: RTR, Roman Dobler.
-
Bild 3 von 4. Curriduras e curridurs en l'arrivada. Bildquelle: RTR, Roman Dobler.
-
Bild 4 von 4. La culissa dal Engiadina Scuol Trail. Bildquelle: RTR, Roman Dobler.
Ils victurs Silvano Pua ed Ida-Sophie Hegemann
Che gist in curridur indigen gudogna la cursa roiala tar la premiera dal Engiadina Scuol Trail, ha fatg grond plaschair als organisaturs. In toc suenter la partenza ha Silvano Pua da Vnà pudì suenter ad Ida-Sophie Hegemann. Davent da là èn els currids ensemen, ed ensemen èn els era vegnids en l’arrivada a Scuol.
Success indigen era tar las cursas medias
Micha Steiner da Samedan e Noe Näff da Sent han mess si il bul a la cursa dals umens sur 20 kilometers. Flurina Eichholzer da Zernez è stada la pli sperta dunna sin questa distanza.
Bilantscha positiva dals organisaturs
L’idea dad organisar ina cursa da trail running en l'Engiadina Bassa hai dà gia dapi in pèr onns. La pandemia ha dentant franà in zichel ils plans. Uss han ins dentant realisà questa idea ed ins vul s’etablir en il chalender da cursas. Cun quai che la concurrenza è magari gronda, han ils organisaturs dal Engiadina Scuol Trail tschernì in termin al principi da la stagiun da currer. La cursa en l'Engiadina Bassa duai era esser ina cursa da preparaziun per ulteriuras cursas, ch'ina atleta u ch'in atlet fa durant la stad.