Siglir tar il cuntegn

Header

cuntegn

Cursas alpinas San Murezzan Omaduas cursas da super-G crodan en la naiv

Naivina, naivetta tgi croda giu da tschel. La naiv da las davosas uras è stada da memia per far il super-G da las dunnas a San Murezzan la sonda. Ed uss èsi cler, ch'i na vegn er dumengia a dar nagin super-G.

Tut fiss stà pront a San Murezzan per las emprimas cursas en las disciplinas spertas da las dunnas. A «chasa» en Engiadin'Ota era tut pront per duas cursas da super-G sin la pista da la Corviglia. Gia avant la fin d’emna da las cursas era l’aura il factur il pli malsegir. E quel factur ha uss procurà ch'ils organisaturs han stuì annullar omaduas cursas. Sco Guido Mittner dal comité d'organisaziun ha ditg envers RTR è oravant tut il privel da lavinas stà la raschun per dir giu er la cursa da dumengia.

Las spezialistas da «speed» cumenzan lur stagiun pia en duas emnas. A Val d'Isère èn planisadas ils 18 fin ils 20 da december duas cursas rapidas ed in super-G.

Fin ad in meter naiv nova

Dapi venderdi naiva quai en Engiadina. Per part hai dà passa in meter naiv. Cun il vent che buffa en ils auts è la cuverta da naiv per part var dus meters auta. Igl è uschia impussibel da rumir tut quella massa naiv sin il traject da circa 2,5 kilometers.

Uschia ha l’organisaziun da las cursas da la cuppa mundiala a San Murezzan decidì da desdir il super-G da la sonda. Ed er per la dumengia na guarda quai or meglier cun l'aura, uschia ch'ils organisaturs han gia la sonda saira annullà il super-G da questa dumengia.

Rumì la naiv e ditg sperà sin ina fanestra

Per ch'ina cursa sin la Corviglia sur San Murezzan fiss stada pussaivla, avessi en emprima lingia stuì chalar da naiver. Ed alura avess ins er anc stuì avair la fortuna dad ina fanestra – dad ina fasa senza precipitaziuns per garantir ina cursa faira. L’organisaziun cun voluntaris e militar ha empruvà tut per pudair realisar ina cursa, ma l'aura ha fatg in stritg tras il quint.

Sfida da porscher cursas en questa situaziun

La lavur resta adina la medema. Cun u senza coronavirus han ins da preparar ina pista perfetga. Tut ils indrizs per las atletas, da las tendas per star a chaud fin tar la mesiraziun dal temp, ed ils voluntaris che fan ina gronda lavur sin u sper la pista, resta tut tuttina. Questa giada datti damain lavur dad installar tribunas, perquai han ins dapli lavur cun saivs che duessan partir la gestiun da skis cun quella speras.

RTR actualitad 12:00++

Artitgels legids il pli savens

Scrollar a sanestra Scrollar a dretga