Il piunier da la cursas da muntogna en Svizra è segir il «Swiss Alpine Marathon» a Tavau. La cursa da currer dat quai dapi l’onn 1986. Adina puspè è la cursa vegnida adattada, adina puspè hai dà novs trajects. Il «Swiss Alpine Marathon» e ses svilup è stà a al cumenzament da quest moviment.
Boom da cursas da trailrunning er en Engiadina
L’emprima cursa sin sendas da muntogna sur ina distanza pli lunga è stada il «Bernina Ultraks» enturn Puntraschigna. L’emprima ediziun è stada l’onn 2016 - l'onn 2020 è la cursa vegnida adattada. Da nov èsi da currer en la stupenta culissa dal Piz Bernina e dal Piz Palü perfin sur il glatscher dal Morteratsch.
Pauc temp suenter è vegnida stgaffida in'ulteriura cursa da trailrunning cun partenza ed arrivada a Samedan cun il num «Engadin Ultra Trail». E per finir datti questa stad per l’emprima giada era ina cursa da trailrunning en Engiadina Bassa: La cursa «Engiadina Scuol Trail» en il territori da Scuol e Motta Naluns.
Trais cursas per in different public
Tuttas trais cursas en l'Engiadina han ses agen caracter. Tar il «Bernina Ultraks» e la stupenta culissa dal Bernina e la pussaivladad da currer sin il glatscher l’attracziun. Il «Engadin Ultra Trail» porscha cun la cursa roiala sur 102 km insatge per curriduras e curridurs fitg ambizius e la cursa «Engiadina Scuol Trail» vul empruvar da sa posiziunar sco cursa da preparaziun gist al principi da la stagiun da cursas. Uschia ha mintgina da las trais cursas ses agen caracter che dess carmalar in agen public.
