La musculara dal ventrigl dal passlungist Dario Cologna na saja anc betg ferma avunda per sa participar a las cursas da la Cuppa mundiala in Canada. Il passlungist desista perquai sin il “Ski Tour Canada” a Montreal.
Sco ch’il secretariat dal maraton engiadinais communitgescha, possia Cologna trenar senza problems e saja er bain en furma. Ina partenza a las cursas da la Cuppa mundiala signifitgass dentant in sforz memia grond per sia musculatura dal ventrigl.
Cun il Maraton da skis engiadinais ed il Vasaloppet haj jau chattà duas interessantas finamiras sportivas
Onur per organisaturs e curriders
Ch’il campiun olimpic è a la partenza da la 48avla ediziun da la cursa da passlung engiadinaisa saja ina grond’onur scriva il president dal Maraton da skis engiadinais, Ivo Damaso en ina communicaziun.
Passa 11'000 passlungistas e passlungists s'han entant già annunziads per la cursa dals 13 da mars 2016 da Malögia a S-chanf.
Dario Cologna ha gia gudagnà il Maraton da skis engiadinais dal 2007 e dal 2010.