Siglir tar il cuntegn

Regiunal «Der Langläufer» – il nov magazin da passlung

Magazins, revistas ed illustradas datti bunamain per tut ils sports e per tut ils hobis. Uss datti er in magazin per il passlung: «Der Langläufer» è in magazin ch’è bunamain 100% grischun.

Markus Schild, l'editur da "Der Langläufer"
Legenda: Markus Schild l'editur da «Der Langläufer». RTR, Roger Alig

Magazins, revistas, illustradas da sport datti bunamain sco sablun sper la mar. I dat magazins da ballape e da hockey, era da quels per mountainbikers, per curriders ni per skiunzs alpins. Uss datti era in magazin da passlung. In da quels na devi propi anc betg en la regiun da las Alps.

Da l'online al print

Markus Schild è l’editur e redactur dal «Langläufer». Che gist el edescha in magazin stampà fa surstar sch'ins enconuscha sia derivanza. Schild vegn numnadamain nà da l’online. El è l’um che stat davos il portal nordic-online.ch, la pagina d'internet per il sport da passlung en Svizra. La tendenza actuala tar ils meds da massa è gie ch'il print, la stampa, perda e l’online crescha.

Markus Schild va uss tschella via: da l’online tar il print. In magazin stampà saja pli persistent. Quel stettia enturn, quel sappia adina puspè prender enta maun, ins sappia palpar el e las bellas fotografias hajan tut in auter effect.

In product quasi 100% grischun

Il magazin «Der Langläufer» è quasi cumplettamain in product grischun. Markus Schild da Claustra è l’editur e redactur, il fotograf è Andrea Badrutt da Cuira e la firma communicaziun.ch a Glion e Cuira ha procurà per la grafica, il layout e la stampa.

Producì en il Grischun per la regiun da las Alps

L'emprima ediziun dal "Der Langläufer"
Legenda: L'emprim'ediziun da «Der Langläufer». RTR, Roger Alig

Vendì vegn «Der Langläufer» en l’entira regiun tudestga da las Alps, pia en la Svizra tudestga, il sid da la Germania, l’Austria, il Principadi dal Liechtenstein ed il Tirol dal sid. El cumpara en in'ediziun da 15'000 exemplars e vegn edì duas giadas ad onn. Da cumprar datti il magazin a partir da glindesdi, ils 21 da november 2016 als kioscs.

RR actualitad 17:00