Siglir tar il cuntegn

Header

cuntegn

Derbi engiadinais Il Cdh Engiadina batta San Murezzan cun 4:3 en la prolungaziun

Il segund derbi da la stagiun da hockey en segunda liga va a favur dal Cdh Engiadina. L’equipa da l’Engiadina Bassa batta San Murezzan cun 4:3 en la prolungaziun. Il gol decisiv ha Sandro Ritzmann fatg.

Avant il gieu eri cler: L’EHC San Murezzan è il favurit da questa partida. L’equipa da l’Engiadina Auta era rangada sin plazza dus da la tabella. Uschia che la rolla dal favurit era tar San Murezzan. La differenza tranter las duas equipas engiadinaisas empurtava be 7 puncts. Uschia era San Murezzan er ditg il patrun dal gieu. L’EHC era ì en avantatg en il gieu, e fin en la 44avla minuta aveva San Murezzan augmentà quest avantatg sin 3:1. Lura dentant èn vegnidas las emoziuns en la partida ed il Cdh ha realisà in culp dubel aifer da bundant trais minutas. Quai è stà il signal per l’equipa da l’Engiadina Bassa ch'i dat tuttina anc da gudagnar insatge en quest gieu.

audio
Sandro Ritzmann Cdh e Jan Lony EHC suenter il derbi
ord Actualitad dals 01.12.2022. Maletg: mad
laschar ir. Durada: 3 minutas 32 Secundas.

Gieu è cupitgà a favur dad Engiadina

Tschintg minutas avant la fin dal temp regular era il Cdh Engiadina puspè enavos en il derbi. A partir da quel mument eran qua er las emoziuns. Cun quest bun sentiment è il Cdh Engiadina ì en la prolungaziun e lura e capità exact quai che capita savens en questas situaziuns. San Murezzan n'è betg pli stà bun da reagir sin il pari ed il Cdh ha fatg il gol. Suenter ina buna acziun ha Sandro Ritzmann procurà cun ses gol per la victoria.

Revantscha grategiada

L’emprim derbi da hockey engiadinais aveva l'EHC San Murezzan gudagnà suenter in festival da gols cun 10:7. Il segund gieu è ì a favur dad Engiadina. La decisiun è crudada en la prolungaziun. Il Cdh ha uschia gudagnà trais partidas en seria e s’ha megliurà sin plazza sis da la tabella. San Murezzan è crudà enavos sin plazza trais.

RTR actualitad 17:00

Artitgels legids il pli savens

Scrollar a sanestra Scrollar a dretga